លោក Tite បានលើកឡើងសារជាថ្មី ចំពោះគម្រោងក្នុងការចាកចេញពីតំណែងគ្រូបង្គោលក្រុមជម្រើសជាតិប្រេស៊ីល បន្ទាប់ពីបានជ្រុះចេញត្រឹមវគ្គ៨ក្រុមចុងក្រោយ World Cup 2022។
ក្រុមសាំបាប្រេស៊ីល បានបរាជ័យទល់នឹងក្រូអាត ដោយបាល់ប៉េណាល់ទីកាត់សេចក្ដី បន្ទាប់ពីលេង១២០នាទី ជាមួយលទ្ធផលស្មើគ្នា ១-១។ ខ្សែប្រយុទ្ធឆ្នើម Neymar រកគ្រាប់បាល់នាំមុខសម្រាប់ក្រុមលោក Tite មុនពេលចប់ម៉ោងបន្ថែម១៥នាទីលើកទី១ ប៉ុន្ដែត្រូវបានក្រូអាតតាមស្មើវិញ ដោយកីឡាករ Bruno Petkovic នៅក្នុងម៉ោងបន្ថែមលើកទី២។
Rodrygo និង Marquinhos បានបរាជ័យក្នុងការស៊ុតបាល់១១ម៉ែត្រ ខណៈក្រុមក្រូអាត ស៊ុតចូលទីបានសម្រេចទាំង៤គ្រាប់ ដែលនាំឱ្យពួកគេមានឱកាសឡើងទៅកាន់វគ្គពាក់កណ្ដាលផ្ដាច់ព្រ័ត្រ World Cup ជាថ្មី។
សម្រាប់បរាជ័យនេះមានន័យថា ក្រុមប្រេស៊ីលបានធ្លាក់ត្រឹមវគ្គ៨ក្រុមចុងក្រោយ World Cup ពីរលើកជាប់គ្នា ក្រោមការដឹកនាំដោយលោក Tite ប៉ុន្ដែលោកបានអះអាងថា នឹងមិនមានការផ្លាស់ប្ដូរចំពោះការសម្រេចចិត្តអនាគតរបស់លោកនោះឡើយ។
គ្រូបង្គោលក្រុមប្រេស៊ីលរូបនេះ បាននិយាយថា៖ “តាមពិតទៅ វាគឺពិតជាពិបាកខ្លាំងណាស់ ប៉ុន្ដែវាជាភាពទាល់ច្រកសម្រាប់ខ្ញុំនៅពេលនេះ ជាមួយនឹងក្រុមជម្រើសជាតិប្រេស៊ីល។
“ខ្ញុំគិតថាដំណើរនេះបានបញ្ចប់ ហើយខ្ញុំបាននិយាយបែបនេះ តាំងពីជាងពាក់កណ្ដាលឆ្នាំមុនមកម្ល៉េះ។ ខ្ញុំគោរពសម្ដីខ្លួនឯង យើងមិនចាំបាច់ធ្វើដ្រាម៉ាចំពោះរឿងនេះទេ។ ខ្ញុំធ្លាប់បាននិយាយនៅពេលនោះដែរថា មានអ្នកជំនាញអាជីពដ៏អស្ចារ្យ ដែលអាចជំនួសខ្ញុំបាន”៕
ប្រភព៖ Live Score