កីឡាករមកពីក្រុមបាល់ទាត់ជម្រើសជាតិបារាំង និយាយថា ក្រុមរបស់ពួកគេបានត្រៀមខ្លួនរួចរាល់ដើម្បីប្រជែងជាមួយ Lionel Messi សម្រាប់ការប្រកួតផ្ដាច់ព្រ័ត្រ FIFA World Cup 2022 រវាងបារាំង និងអាហ្សង់ទីន នាថ្ងៃអាទិត្យខាងមុខ។
ក្រុមមាន់គកបារាំង ដែលជាក្រុមការពារតំណែងជើងឯក បានត្រៀមជួបជាមួយក្រុមខ្លាំងមកពីឡាទីន ខណៈដែលតារាឆ្នើម Lionel Messi បានបង្ហាញពីមហិច្ឆតារបស់ខ្លួន ក្នុងការឈ្នះពាន World Cup ជាលើកដំបូង។
ប៉ុន្ដែកីឡាករក្នុងក្រុមដឹកនាំដោយលោក Didier Deschamps មានទំនុកចិត្តថា ពួកគេនឹងរារាំងមិនឱ្យម្ចាស់ពាន Ballon d’Or រូបនេះបង្កការលំបាកដល់ក្រុមរបស់ពួកគេឡើយ។
ខ្សែការពារស្លាបឆ្វេង Theo Hernandes បានថ្លែងប្រាប់ Rai Sport ថា៖ “ការលេងក្នុងវគ្គផ្ដាច់ព្រ័ត្រ World Cup ២លើកជាប់គ្នា គឺជាពេលវេលាដ៏អស្ចារ្យ។ យើងនឹងប្រឹងប្រែងឱ្យបានខ្លាំង ដើម្បីឈ្នះវគ្គផ្ដាច់ព្រ័ត្រលើកនេះ។ យើងត្រូវតែគិតពីប្រកួតវគ្គផ្ដាច់ព្រ័ត្រ”។
“ខ្ញុំហត់នឿយ ប៉ុន្ដែវាពិតជាល្អណាស់ដែលអាចឈ្នះ វគ្គពាក់កណ្ដាលផ្ដាច់ព្រ័ត្រ World Cup។ ពេលនេះសូមសម្រាកសម្រាប់ថ្ងៃអាទិត្យ។ Messi មិនធ្វើឱ្យយើងភ័យខ្លាចនោះទេ, អាហ្សង់ទីន គឺជាក្រុមដែលអស្ចារ្យមួយ ប៉ុន្ដែយើងមានពេលពីរបីថ្ងៃដើម្បីធ្វើការងារនេះ”៕
ប្រភព៖ Goal