អតីតជើងចាស់ក្លឹប Arsenal លោក William Gallas បាននិយាយដល់ឈ្មោះកីឡាករវ័យក្មេង លេងតំណែងប្រយុទ្ធ ថាពេលវេលាតទៅមុខ នឹងមានការប្តេជ្ញាបំបែករាល់កំណត់ត្រារបស់ Lionel Messi ក៏ដូចជា Cristiano Ronaldo ជាក់ជាមិនខាន។
នោះគឺ Kylian Mbappe ដែលគ្រាប់បាល់របស់គេនៅក្លឹប បានរំកិលឡើងជាបន្តបន្ទាប់ ដ្បិតពានឯកត្តជន Ballon d’Or មិនទាន់សម្រេចនៅឡើយ រួមទាំងពានរង្វាន់ UEFA Champions League ផងដែរ។ យ៉ាងណាបើនិយាយអំពីពាន World Cup គឺត្រៀមនឹងក្តោបឱកាសឈ្នះលើកទី ២ នៅយប់ស្អែកនេះ បើអាចយកឈ្នះទៅលើអាហ្សង់ទីន។
ងាកមក Gallas និយាយ៖ “ខ្ញុំយល់ឃើញថា Kylian Mbappe អាចឈានដល់កម្រិត Messi និង Ronaldo គេនឹងតែងតែចង់ក្លាយជាកីឡាករល្អបំផុត ហើយនឹងដក់ជាប់ក្នុងអារម្មណ៍របស់គេរៀងរហូតទៅ ជាការពិត Messi/Ronaldo គឺជាគំរូដ៏ល្អសម្រាប់គេ ហើយ Mbappe ផ្ទាល់នឹងចង់បំបែកកំណត់ត្រាទាំងអស់នោះ”។
លោកបន្តថា៖ “ពេលអ្នកមានកម្លាំងកាយចិត្តច្បាស់លាស់ អ្នកនឹងមានការខិតខំប្រឹងប្រែងនៅរយៈកាលយូរ ហើយជាមួយសមត្ថភាពដែល Mbappe មាន ម្ល៉េះគេនឹងអាចបន្តរយៈពេលយូរ ហើយកាន់តែកៀកនឹងលំដាប់វីរបុរសទាំងពីរ គឺ Messi និង Ronaldo ជាក់ជាមិនខាន”៕
ប្រភព៖ Sportskeeda