នៅវេលាម៉ោង ១០:០០ នាទីយប់ ថ្ងៃសុក្រ ទី ១៩ មករា ក្លឹបសេដ្ឋីបារាំង Paris Saint-Germain នឹងត្រូវធ្វើដំណើរហោះទៅកាន់ទីក្រុង Riyad ប្រទេសអារ៉ាប៊ីសាអូឌីត ដើម្បីប្រកួតទល់ឈុត All Star នៃប្រទេសមួយនោះ ជាការបូកបញ្ចូលរវាងក្លឹប Al Nassr និង Al Hilal។
ជាលទ្ធផលយើងក៏អាចដឹងជាមុន ថាក្នុងចំណោម ១១ នាក់របស់ក្លឹបខាងអារ៉ាប៊ីសាអូឌីត ពិតណាស់នឹងមានវត្តមានតារាឆ្នើម Cristiano Ronaldo នាំឲ្យទាញទុកជាមុនថា ការជួបគ្នារវាងកំពូលកីឡាករចាស់វស្សាទាំងពីររូប ពោល Ronaldo ទល់ Messi ប្រាកដនឹងកើតឡើងមិនខាននាថ្ងៃនោះ។
ទោះយ៉ាងណាការប្រកួតដែលធ្វើឡើងនៅកីឡដ្ឋាន King Fahd International Stadium អាចផ្ទុកអ្នកទស្សនាបានត្រឹម ៦៨ ០០០ នាក់ប៉ុណ្ណោះ តែឥឡូវមកមើលសន្ទុះអ្នកចង់ទិញសំបុត្រទស្សនាការប្រកួត គឺឡើងដល់ ២ លាននាក់ទៅហើយ។ វាច្រើនរាប់សិបដងធៀបនឹងទំហំអាចផ្ទុកអ្នកទស្សនា ក្នុងកីឡដ្ឋានទាំងមូល។
គួរឲ្យដឹងដែរថា នេះអាចជាលើកចុងក្រោយនៃការប៉ះគ្នារវាង Legend ទាំង ២ ក្នុងវិស័យបាល់ទាត់ ដ្បិតអីការជួបគ្នាលើកចុងក្រោយ កើតឡើងនៅខែធ្នូ ឆ្នាំ ២០២០ គ្រានោះ Ronaldo រកបាន ២ គ្រាប់ជួយ Juventus យកឈ្នះទៅលើ Barcelona ជាក្លឹប Messi ឈរជើង ជាមួយលទ្ធផល ៣-០៕
ប្រភព៖ Sportskeeda