ក្លិបតោខៀវ Chelsea ក្នុងពេលថ្មីៗនេះ ត្រូវបានគេរាយការណ៍មកថា គ្រោងនឹងធ្វើការផ្តល់ជូនសំណើកុងត្រាថ្មីបន្ថែមដល់កីឡាករវ័យ ៣៨ ឆ្នាំរបស់ខ្លួនម្នាក់ ឱ្យស្នាក់នៅទឹកដី Stamford Bridge បន្តទៀត ។
ជាក់ស្តែង កីឡាករដែល Chelsea មិនចង់ឱ្យដើរចេញទៅណានោះ ខ្សែការពារ Thiago Silva នៅពេលដែលគេបានក្លាយជាផ្នែកដ៏សំខាន់មួយរបស់ក្លិប ដោយបានបង្ហាញខ្លួន ១០៥ ប្រកួតរួចមកហើយ ចាប់តាំងពីបានមកដល់ក្លិប ពីក្លិប PSG ក្នុងឆ្នាំ ២០២០ មក ។
ហើយយ៉ាងណាមិញ អ្នកចាត់ការក្រុម Chelsea លោក Graham Potter ដែលបានចូលមកជំនួសតំណែងរបស់លោក Thomas Tuchel កាលពីក្នុងខែកញ្ញា ត្រូវបានគេរាយការណ៍ថា មានបំណងចង់ឱ្យ Silva ស្នាក់នៅបន្តទៀត ខណ:ពេលដែលកុងត្រាបច្ចុប្បន្នរបស់គេ នឹងត្រូវបញ្ចប់ នៅដំណាច់រដូវកាលនេះហើយ ។
លើសពីនេះ បើតាយោងតាមការចុះផ្សាយពីកាសែត The Times បានបង្ហាញថា លោក Potter ចាត់ទុក Silva ថាជាកីឡាករគំរូម្នាក់សម្រាប់ក្រុម និងបានព្យាយាមណែនាំឱ្យថ្នាក់ដឹកនាមរបស់ក្លិបបន្ថែមកុងត្រាថ្មី ជូនតារាឆ្នើមសញ្ជាតិប្រេស៊ីលរូបនេះ ហើយត្រូវបានគេជឿជាក់ថា នឹងធ្វើឱ្យគេ អាចលេងឱ្យក្លិបអង់គ្លេស រហូតដល់វ័យ ៤០ ឆ្នាំឯណោះ ៕
ប្រភព: Metro