បើទោះបីជា ទើបបានបន្ដកិច្ចសន្យាសម្រាប់ខ្សែប្រយុទ្ធ Kylian Mbappe កាលពីរដូវក្ដៅឆ្នាំមុន ប៉ុន្ដែពេលនេះក្លិប Paris Saint–Germain នៅតែមានក្ដីកង្វល់ពាក់ព័ន្ធអនាគតរបស់ខ្សែប្រយុទ្ធបារាំងរូបនេះ ស្របពេលដែលក្លិប Real Madrid មិនបោះបង់បំណងក្នុងការចង់បានរូបគេទៅចូលរួមក្រុម។
ទោះយ៉ាងណាក្ដី ប្រធានក្លិប PSG លោក Nasser Al–Khelaifi មានអារម្មណ៍មិនសប្បាយចិត្តចំពោះការព្យាយាមចង់បានរបស់ក្លិបអេស្ប៉ាញមួយនេះ ដ្បិតរូបគេនៅសល់កុងត្រានៅ Parc des Princes។
ប្រសិនបើ Mbappe ចាកចេញពីក្លិបនោះ PSG នឹងសងសឹក Real Madrid ដោយព្យាយាមនាំយកខ្សែប្រយុទ្ធប្រេស៊ីល Vinicius Junior មកបារាំង។ កន្លងមក អតីតនាយកផ្នែកកីឡារបស់ PSG លោក Leonardo ធ្លាប់មានបំណងចង់បាន អតីតយុវជនរបស់ Flamengo រូបនេះទៅចូលរួម ប៉ុន្ដែចុងក្រោយ គេបានសម្រេចចិត្តបន្ដរួមរស់នៅ Santiago Bernabeu។
កិច្ចសន្យារបស់ Vinicius នៅសល់សុពលភាពរហូតដល់ខែមិថុនា ឆ្នាំ២០២៤ ហើយក្លិប Real Madrid កំពុងត្រៀមកិច្ចសន្យាថ្មីសម្រាប់ខ្សែប្រយុទ្ធរូបនេះ។ កុងត្រាបច្ចុប្បន្នរបស់ Vinicius មានតម្លៃ១០០០លានអឺរ៉ូ ប៉ុន្ដែ PSG អាចមានលទ្ធភាពបង្កើតភាពភ្ញាក់ផ្អើលនៅក្នុងទីផ្សារដោះដូរ ដូចដែលពួកគេធ្លាប់បានធ្វើជាមួយ Barcelona។
ក្នុងរដូវក្ដៅឆ្នាំ២០១៧ ក្លិបនេះបានចំណាយទឹកប្រាក់ ២២២លានអឺរ៉ូនាំយក Neymar ទៅចូលរួម ដែលបច្ចុប្បន្នពុំទាន់មានក្លិបណាបំបែកកំណត់ត្រានេះបាននៅឡើយទេ៕
ប្រភព៖ Be Soccer