ក្លិបហង្សក្រហម Liverpool ត្រូវបានគេរាយការណ៍មកថា បានកំណត់យកខ្សែប្រយុទ្ធរបស់ក្លិបនៅក្នុងក្របខ័ណ្ឌ Serie A ម្នាក់ មកជំនួសតំណែងរបស់កីឡាករ Mohamed Salah រយ:ពេលវែងនៅឯទឹកដី Anfield ។
ជាការពិតណាស់ អនាគតរបស់ Salah ត្រូវបានលេចឡើងជាសំណួរ បន្ទាប់ពីគេត្រូវបានភ្ជាប់ទំនាក់ទំនងយ៉ាងខ្លាំង ជាមួយនឹងការផ្ទេរទៅកាន់ក្លិបដទៃទៀត ដែលមានដូចជា Barcelona និង Real Madrid កាលពីឆ្នាំមុន ប៉ុន្តែយ៉ាងណាក៏ដោយ គេបានសម្រេចចិត្ត បន្តកុងត្រាថ្មី ជាមួយក្រុមលោក Klopp រហូតដល់ឆ្នាំ ២០២៥ ។
ប៉ុន្តែបើយោងតាមការចុះផ្សាយពីសារព័ត៌មានអ៊ីតាលី Calciomercatoweb កាលពីពេលថ្មីៗនេះ បានអះអាងថា ក្លិប Liverpool ហាក់ដូចជាបានកំណត់យកខ្សែប្រយុទ្ធ Federico Chiesa ជាបេក្ខភាពនាំមុខគេមួយ ដើម្បីមកជំនួសតំណែងរបស់ Salah នាពេលអនាគត ។
ជម្រាបជូនផងដែរថា Chiesa បានសម្រេចផ្ទេរមកចូលរួមជាមួយក្លិប Juventus ជាអចិន្ត្រៃយ៍ពីក្លិប Fiorentina ក្រោយពីបានលេងក្នុងលក្ខខណ្ឌខ្ចីជើងអស់ ២ រដូវកាល ប៉ុន្តែជាមួយនឹងស្ថានភាពមិនល្អរបស់ក្លិបអ៊ីលីតា ក្នុងពេលបច្ចុប្បន្ននេះ វាត្រូវបានគេជឿជាក់ថា ខ្សែប្រយុទ្ធសញ្ជាតិអ៊ីតាលីរូបនេះ អាចនឹងបើកចំហឱកាស ក្នុងផ្ទេរមកកាន់ទឹកដី Premier League នាពេលអនាគត ៕
ប្រភព: Sportsmole