ថ្មីៗនេះ អ្នកតំណាងរបស់លោក Jose Mourinho ត្រូវបានគេរាយការណ៍មកថា បានធ្វើការទាក់ទងទៅកាន់ក្លិបធំមួយនៅក្នុងក្របខ័ណ្ឌ Premier League ដើម្បីសាកសួរអំពីលទ្ធភាព ជុំវិញការវិលត្រលប់ទៅកាន់ដឹកនាំក្រុមនៅទីនោះវិញ ។
ជាក់ស្តែង នេះបើយោងតាមការចុះផ្សាយពី Daily Mail ដែលបានបង្ហាញឱ្យដឹងថា លោក Mourinho បច្ចុប្បន្ននេះ ហាក់មានភាពខកចិត្តចំពោះស្ថានភាពហិរញ្ញវត្ថុរបស់ក្លិប AS Roma ហើយមានឆន្ទ:ក្នុងការស្វែងរកក្លិបផ្សេងទៀត ដែលអាចមានលទ្ធភាពគ្រប់គ្រាន់ ក្នុងការបំពេញតាមបំណងប្រាថ្នារបស់គាត់បាន ។
ហើយឥឡូវនេះ បើតាមប្រភពខាងលើនោះ បានបង្ហាញថា អ្នកតំណាងរបស់លោក Mourinho កំពុងធ្វើការទាក់ទងជាមួយក្លិបតោខៀវ Chelsea ដើម្បីសាកសួរអំពីលទ្ធភាព ក្នុងការវិលត្រលប់ទៅកាន់ទឹកដី Stamford Bridge ជាលើកទី ៣ ក្នុងអាជីពរបស់គាត់ ។
រំលឹកផងដែរថា បុរសញ្ជាតិព័រទុយហ្គាល់រូបនេះ ធ្លាប់បានឈ្នះពានរង្វាន់ Premier League បីលើក ជាមួយ Chelsea រួមទាំងពាន FA Cup និងពានរង្វាន់ League Cup ចំនួន ៣ លើកផងដែរ ប៉ុន្តែអំឡុងពេលនោះ លោក Mourinho មិនធ្លាប់បានឈ្នះពានរង្វាន់ Champions League ជាមួយ Chelsea នោះឡើយ ៕
ប្រភព: Sportskeeda