ដោយធ្លាប់បានចាយពេលអស់ ៣ ឆ្នាំ នៅអេស្ប៉ាញ ជាមួយក្លិប Atletico Madrid ថ្មីៗនេះ ខ្សែការពារស្លាបស្តាំរបស់ក្រុម Newcastle United កីឡាករ Kieran Trippier បានបង្ហាញប្រាប់ពីកីឡាករម្នាក់ ថាជាគូប្រជែងដ៏លំបាកបំផុត ដែលខ្លួនធ្លាប់បានជួប នៅលើទីលានប្រកួត ។
ជាក់ស្តែង Trippier ធ្លាប់បានរួមចំណែកជួយឱ្យ At Madrid លើកពានរង្វាន់ La Liga នៅក្នុងរដូវកាលឆ្នាំ ២០២០–២១ មុនពេលសម្រេចចិត្តវិលត្រលប់មកកាន់ទឹកដីអង់គ្លេសវិញ ជាមួយក្លិប Newcastle នៅក្នុងតម្លៃខ្លួន ១២ លានផោន ក្នុងឆ្នាំ ២០២២ ។
ប៉ុន្តែយ៉ាងណាក៏ដោយ អំឡុងពេលចាយពេលនៅទឹកដីអេស្ប៉ាញ ខ្សែការពារសញ្ជាតិអង់គ្លេសរូបនេះ បានធ្វើការចែករំលែកអំពីបទពិសោធរបស់ខ្លួន ក្នុងការលេងតទល់ជាមួយនឹងខ្សែប្រយុទ្ធកំពូល Lionel Messi និងបានទទូចថាតារាឆ្នើមអាហ្សង់ទីនរូបនេះ គឺជាកីឡាករល្អបំផុត ដែលគេធ្លាប់បានជួប ។
មិនតែប៉ុណ្ណោះ Trippier បាននិយាយថា៖ ” Messi ប្រៀបបីដូចគ្រូវេទមន្តនៅលើទីលានអ៊ីចឹង និយាយតាមត្រង់ទៅចុះ អ្នកមិនអាចមានឱកាសយកបាល់ចេញពីជើងរបស់គាត់បាននោះឡើយ ” ៕
ប្រភព: Sportmob