អតីតខ្សែប្រយុទ្ធឆ្នើមរបស់ Liverpool, Sadio Mane ដែលបច្ចុប្បន្នកំពុងប្រកបអាជីពនៅក្លិប Bayern Munich ត្រូវបានសួរអំពីកីឡាករដែលគេគិតថា បញ្ចប់ទីបានល្អបំផុត ហើយចម្លើយរបស់កីឡាករសេណេហ្កាល់រូបនេះ គឺមិនមែនអតីតដៃគូយល់ចិត្ត Mohamed Salah នោះទេ។
Mane បានសម្រេចចិត្តចាកចេញពីទឹកដី Anfield ទៅរួមរស់នៅ Allianz Arena ក្នុងរដូវក្ដៅឆ្នាំ២០២២ បន្ទាប់ពីបានជួយសម្រេចជោគជ័យយ៉ាងច្រើនសម្រាប់ក្លិប ហង្សក្រហមរយៈពេល៦ឆ្នាំ។
គេបានជួយក្រុមដឹកនាំដោយលោក Jurgen Klopp ឈ្នះជើងឯក Premier League និង UEFA Champions League ជាមួយនឹងការបង្ហាញសមត្ថភាពរកគ្រាប់បាល់យ៉ាងល្អជាមួយដៃគូតំបន់ប្រយុទ្ធ Roberto Firmino និង Salah។
ប៉ុន្ដែ Mane ពុំបានជ្រើសរើស អតីតមិត្តរួមក្រុមដែលជារឿយៗឈ្នះពានស្បែកជើងមាសនៅ Premier League ជាកីឡាករបញ្ចប់ទីល្អបំផុត ដែលគេធ្លាប់លេងជាមួយនោះទេ។
នៅក្នុងវីដេអូ Tiktok មួយរបស់ 1teamsports, Mane ត្រូវបានសួរថាតើកីឡាកររួមក្រុមរូបណាដែលបញ្ចប់ទីល្អបំផុត ហើយគេបានតបថាកីឡាកររូបនោះគឺ Divock Origi។
លោក Jurgen Klopp ក៏បានសរសើរកីឡាករបែលហ្ស៊ិករូបនេះផងដែរ ដោយចាត់ទុកជាវីរបុរសទាំងក្នុង និងក្រៅទីលាន និងជាអ្នកបញ្ចប់ទីដ៏ល្អបំផុតផងដែរ។
Origi រកគ្រាប់បាល់បាន២១គ្រាប់ សម្រាប់ Liverpool ពីការបង្ហាញខ្លួន១៧៥លើក ប៉ុន្ដែនៅក្លិបថ្មី AC Milan ដែលគេបានផ្លាស់ទៅ កាលពីរដូវក្ដៅកន្លងទៅ គេរកបានតែពីរគ្រាប់ប៉ុណ្ណោះ ក្នុងចំណោម ២១ប្រកួត៕
ប្រភព៖ Goal