វីរបុរសហូឡង់ លោក Ruud Gullit ថ្មីៗនេះ បានបង្ហាញពីឈ្មោះក្រុមគួរឱ្យភ្ញាក់ផ្អើលមួយ ដែលគិតថាអាចមានភាគរយច្រើន ក្នុងការឈ្នះពានរង្វាន់ UEFA Champions League នៅរដូវកាល ២០២២–២៣ នេះ ។
ជាក់ស្តែង ក្រុមដែលលោក Gullit ចង់សំដៅលើនោះ គឺ Napoli បន្ទាប់ពីពួកគេ កំពុងបង្ហាញពីទម្រង់លេងដ៏លេចធ្លោបំផុតមួយ នៅរដូវកាលនេះ ជាមួយនឹងការឈរនៅលើកំពូលតារាងក្របខ័ណ្ឌ Serie A និងនាំមុខរហូតដល់ ១៥ ពិន្ទុ ពីក្រុមលេខ ២ Inter Milan ។
យ៉ាងណាមិញ Napoli នឹងត្រូវប្រឈមមុខជាមួយនឹងក្រុមជើងខ្លាំងអាល្លឺម៉ង់ Eintracht Frankfurt នៅក្នុងការប្រកួតជើងទី ១ វគ្គ ១៦ ក្រុមចុងក្រោយ ពាន UCL នៅទឹកដី Deutsche Bank Park នារាត្រីនេះផងដែរ ។
ហើយមិនតែប៉ុណ្ណោះ បើទោះបីជា Real Madrid , Man City និងក្រុមធំៗផ្សេងទៀត ក៏កំពុងស្ថិតនៅក្នុងការប្រកួតប្រជែងពានរង្វាន់ធំបំផុតរបស់អឺរ៉ុបមួយនេះក៏ដោយ ប៉ុន្តែលោក Gullit បានបង្ហាញការជឿជាក់ថា Napoli នៅតែអាចប្រជែងដណ្តើមពាន UCL ឆ្នាំនេះ ។
លើសពីនេះ លោក Gullit បាននិយាយថា ៖ ” សម្រាប់ខ្ញុំ Napoli គឺជាក្រុមដែលមានភាគច្រើន ក្នុងការឈ្នះពាន UCL ព្រោះការលេងរបស់ពួកគេ គឺពិតជាគួរឱ្យចាប់អារម្មណ៍ខ្លាំងណាស់។ គួរគេលេងប្រយុទ្ធ និងប៉ះបាល់លឿនៗ។ ពិតណាស់ Bayern ពិតជាក្រុមដ៏ខ្លាំង ហើយយើងក៏មិនអាចដឹងពីអ្វីដែល R.Madrid នឹងធ្វើនោះឡើយ។ ប៉ុន្តែសម្រាប់ខ្ញុំ Napoli នឹងធ្វើឱ្យមានភាពខុសប្លែកក្នុងពាននេះ ” ៕
ប្រភព: Sportskeeda