ថ្មីៗនេះ បើតាមការចុះផ្សាយពីសារព័ត៌មាន Central Defense បានបង្ហាញឱ្យដឹងថា អតីតចាត់ការក្រុមរបស់ Paris Saint-Germain នៅតែបន្តរង់ចាំការខលហៅពីសំណាក់ក្លិប Real Madrid ជុំវិញការទៅជំនួសតំណែងរបស់លោក Carlo Ancelotti នាពេលខាងមុខ ។
ជាក់ស្តែង បច្ចុប្បន្នតំណែងរបស់លោក Ancelotti ហាក់កំពុងស្ថិតនៅក្នុងការតាមដានយ៉ាងដិតដល់ ជុំវិញការដឹកនាំក្រុមមិនសូវបានល្អ ជាពិសេសនៅក្នុងការប្រកួតក្នុងលីគ ដោយ Madrid កំពុងតាមពីក្រោយក្រុមកំពូលតារាង Barcelona ជាច្រើនពិន្ទុ ។
មិនតែប៉ុណ្ណោះ កុងត្រាបច្ចុប្បន្នរបស់លោក Ancelotti ក៏កាន់តែខិតជិតបញ្ចប់ហើយផងដែរ ដោយមានសុពលភាពត្រឹមដំណាច់រដូវកាលក្រោយប៉ុណ្ណោះ ចំពេលគាត់ក៏ត្រូវបានភ្ជាប់ទំនាក់ទំនងយ៉ាងខ្លាំង ជាមួយនឹងការទៅដឹកនាំក្រុមជម្រើសជាតិប្រេស៊ីល ដែលកំពុងទំនេរផងដែរ ។
ជុំវិញស្ថានភាពបែបនេះហើយ ទោះបើពេលថ្មីៗនេះ អតីតគ្រូបង្វឹកលោក Mauricio Pochettino កំពុងធ្វើការតាមដានយ៉ាងដិតដល់ ជុំវិញឱកាសទៅកាន់តំណែងនៅក្នុងក្រុម Real Madrid ហើយក៏កំពុងទន្ទឹងរង់ចាំការខលហៅពីសំណាក់ក្លិបយក្សអេស្ប៉ាញផងដែរ ។
ជម្រាបជូនឱ្យដឹងថា លោក Pochettino បច្ចុប្បន្ននៅតែទំនេរពីការងារ ចាប់តាំងពីលោកបានចែកផ្លូវគ្នាពីក្រុម PSG បន្ទាប់ពីបានដឹកនាំក្រុមយក្សបារាំង បាន ៨៤ ប្រកួត ដោយឈ្នះ ៥៦ លើក ស្មើ ១៣ និងចាញ់ ១៥ ដង ៕
ប្រភព: Sportskeeda