ក្លឹបបិសាចក្រហម Manchester United នារយៈពេលចុងក្រោយ ល្ហៀងៗមានដំណឹងចង់នាំយក Neymar Jr ចេញពី PSG មកចូលរួមនៅ Old Trafford ហើយតាមចចាមអារ៉ាមគ្រោងអាចកើតឡើងទៅបានលើទីផ្សារដោះដូររដូវក្តៅខាងមុខ។
ទោះជាយ៉ាងណានៅថ្ងៃនេះក៏មានការលើកឡើងមួយពីអ្នកវិភាគត្រង់ថា United មិនអាចចេះតែយកបានឡើយ ដ្បិតការនាំយកកីឡាករប្រេស៊ីល ពិតណាស់លុះត្រាតែក្លឹបព្រមបំពានច្បាប់ចាស់ ដែលអ្នកចាត់ការលោក Erik ten Hag ធ្លាប់បានអះអាង ហើយក៏ធ្លាប់អនុវត្តលើ Cristiano Ronaldo រួចហើយដែរ។
នោះគឺកន្លងមកធ្លាប់ធ្វើទុក្ខបុកម្នេញដល់ CR7 ចាកចេញ ដ្បិតមានការអះអាងច្បាស់ថាក្លឹបនឹងមិនចំណាយប្រាក់លើកីឡាករណាម្នាក់ ឲ្យលើសខ្ពស់ជ្រុលធៀបនឹងកីឡាករដទៃឡើយ។ កាលនោះ Ronaldo រកបានខ្ទង់ជិត ៤០ មុឺនផោន ខណៈកីឡាករដទៃផ្សេងទៀតបានទាបជាងឆ្ងាយ ហើយច្បាប់ក្រោយមកគឺតម្រឹមប្រាក់ឈ្នួលប្រហែលគ្នា ខ្ពស់បំផុតត្រឹម ២០ មុឺនផោនប៉ុណ្ណោះឯង។
នេះក៏បានយកទៅអនុវត្តលើអ្នកចាំទី David de Gea ដូចគ្នា ប្រសិនតកុងត្រាថ្មី គឺលុះត្រាព្រមទទួលយកការបញ្ចុះតម្លៃប្រាក់ឈ្នួល។ រីឯ Neymar ឯណោះ សព្វថ្ងៃមួយសប្តាហ៍រកបានជិត ១ លានផោននៅ PSG អ៊ីចឹងវាគ្មានផ្លូវអាចទៅរួចឡើយ មកបញ្ចុះសល់ល្បាក់ ២០ មុឺនផោន ជារួមលុះត្រាណាតែ United ដើរហួសសម្តីដែលខ្លួននិយាយកាល Ronaldo នៅឈរជើង ទើបទៅរួច៕
ប្រភព៖ SportBible