កាលពីយប់មិញបើទោះបីបានយកឈ្នះទៅលើតោខៀវ Chelsea ៤-១ តែក្លឹបដឹកនាំដោយអ្នកចាត់ការលោក Erik ten Hag បានរបួសកីឡាករសំខាន់នៅតំណែងស្លាបគឺ Antony ហើយតាមស្ថានភាព គឺគេនឹងសម្រាកដល់បញ្ចប់រដូវកាលនោះឯង ដ្បិតសល់ត្រឹម ២ ប្រកួតប៉ុណ្ណោះ។
អ្វីដែលសំខាន់គឺការតតាំង Manchester City នៅថ្ងៃទី ៣ មិថុនាខាងមុខ ជាភារកិច្ចសំខាន់ឥតខ្វះបាន យ៉ាងណាសោកស្តាយដែលកីឡាករប្រេស៊ីលរំពឹងមិនអាចមានវត្តមានចូលរួមក្នុងប្រកួតខាងមុខ។ បើតាមការយល់ឃើញរបស់លោក Paul Scholes ជាអតីតកីឡាករមួយរូបនៅ Old Trafford បានសង្កត់ធ្ងន់ថា Jadon Sancho គឺសក្តិសមបំផុតនឹងទៅបំពេញតំណែងស្លាប នាប្រកួតខែក្រោយ។
លោក Scholes និយាយប្រាប់ Premier League Productions យ៉ាងដូច្នោះ៖ “យើងអាចប្រើប្រាស់កីឡាករនោះហើយ តែពេលខ្លះមិនសំណាង ហើយដូចយប់នេះជាមួយករណី Antonyដោយគេធ្វើបានល្អណាស់ ដូច្នេះខ្ញុំមើលឃើញគឺមាន Sancho ដែលល្អដូចគ្នា នឹងអាចទៅបំពេញកន្លែងនោះ”។
លោកបន្ត៖ “វាអាចថាជារដូវកាលដ៏ពិបាកមួយសម្រាប់គេ តែយ៉ាងណាគេហាក់ត្រៀមខ្លួនរួចរាល់ គេមើលទៅលឿន និងជឿជាក់ខ្លាំងណាស់ ខ្ញុំគិតថា Sancho គេអាចមកចូលរួមនៅវគ្គផ្តាច់ព្រ័ត្រ FA Cup ខាងមុខបាន”៕
ប្រភព៖ Metro