ក្លឹបកាំភ្លើងធំ Arsenal ត្រូវបានរាយការណ៍ថា កំពុងដាក់គោលដៅឥតដកភ្នែកពីខ្សែប្រយុទ្ធស្លាប Marco Asensio ដ្បិតអីកីឡាករសញ្ជាតិអេស្ប៉ាញ ប្រុងនឹងផុតកុងត្រា ក្លាយជាកីឡាករឥតតម្លៃខ្លួនលើទីផ្សារដោះដូរនៅចុងខែក្រោយ។
យុវជនលេងបម្រើក៏បាន ប្រយុទ្ធស្លាបក៏បាននោះ ហាក់ទទួលបានការចាប់អារម្មណ៍ជាពន់ពេកពីគ្រូរួមសញ្ជាតិលោក Mikel Arteta ដោយជឿថា វត្តមានរបស់ Asensio នឹងអាចចូលទៅប៉ះប៉ូវប្រព័ន្ធលេង ជាពិសេសតំបន់ខាងលើរបស់ក្លឹបបាននៅរដូវកាលក្រោយ។
តាមសារព័ត៌មាន Onda Cero រាយការណ៍មកថា ក្លឹបស្ថិតក្នុងទីក្រុងឡុងបានរៀបចំកិច្ចព្រមព្រៀងនានាជាបណ្តើរៗ នេះរង់ចាំតែពេលវេលាមកដល់ សឹមធ្វើការចរចាយកលទ្ធផលសម្រេចរវាងភាគីកីឡាករប៉ុណ្ណោះឯង។
រំឭកបន្តិចថា កីឡាករវ័យ ២៧ ឆ្នាំ បានបដិសេធមិនបន្តនៅក្លឹបស្តេចស ក្រោមហេតុផលជាន់ Role នឹងកីឡាករជាច្រើន ជារួមបើបន្ត ក៏មិនមានឱកាសលេងជាប់លាប់ដែរ។ ពេលវេលាចុងក្រោយ មិនត្រឹម Arsenal ប៉ុណ្ណោះទេ រួមទាំងក្លឹបអ៊ីតាលី AC Milan និងក្លឹបបារាំង Paris Saint-Germain ក៏បាក់ចិត្តចង់បានគេដូចគ្នា៕
ប្រភព៖ Metro