អតីតកីឡាកររបស់សំពៅមាសលោក David Silva បានបញ្ចេញមតិ ដោយជឿជាក់មួយទំហឹងទៅលើ Arsenal ថាមានលទ្ធភាពអាចប្រជែងពានរង្វាន់លីគកំពូលអង់គ្លេស ជាមួយក្លឹប Manchester City សម្រាប់រដូវកាល ២០២៣/២៤ នេះបាន។
យើងក្រឡេកទៅមើលតារាងចំណាត់ថ្នាក់បន្តិច ពេលនេះក្លឹបដឹកនាំដោយអ្នកចាត់ការលោក Pep Guardiola ឈ្នះទាំង ៤ ជុំមាន ១២ ពិន្ទុពេញ នៅកំពូល ខណៈក្លឹបដឹកនាំដោយអ្នកចាត់ការលោក Mikel Arteta ឈរលេខរៀងទី ៥ មាន ១០ ពិន្ទុ ក្រោយឈ្នះ ៣ ស្មើ ១ មិនទាន់ស្គាល់ចាញ់។
យ៉ាងណា Silva និយាយប្រាប់ទៅកាសែត The Mirror៖ “City ពួកគេជាក្លឹបដ៏អស្ចារ្យ ជាមួយបណ្តុំកីឡាករដ៏អស្ចារ្យជាច្រើន ហើយនេះជារដូវកាលទី ៨ របស់ Pep ត្រង់ឆ្នាំដំបូងគាត់ផ្សាំខ្លួននឹង Premier League បានបាត់ទៅហើយ ដល់ឥឡូវពួកគេក្លាយជាក្លឹបដែលសឹងតែគ្មានអ្នកអាចបញ្ឈប់”។
លោកបន្តថា៖ “Arsenal ជាក្លឹបតែមួយគត់ ខ្ញុំមើលឃើញថាប្រហែលមានឱកាសអាចប្រជែងនឹង City ពេលឥឡូវនេះបាន បើសួរថាតើចុះក្លឹបដទៃទៀត ខ្ញុំគិតថាគ្មានអ្នកអាចទៅរួចទេ ដោយខ្ញុំមើលការប្រកួតរដូវកាលមុនរបស់ City ពួកគេសក្តិសមនឹងទទួលបានវា ដូចគ្នាទាំងសម្រាប់អ្នកគាំទ្រនៅពានរង្វាន់ទាំង ៣”៕
ប្រភព៖ The Mirror