ទាំងកីឡាករ Marcus Rashford និង Paul Pogba ត្រូវបានគេរាយការណ៍មកថា សុទ្ធតែធ្លាប់បានបដិសេធឱកាស ក្លាយជាប្រធានក្រុមរបស់ Manchester United ក្រោមការដឹកនាំរបស់អតីតគ្រូបង្វឹក លោក Ole Gunnar Solskjaer។
ជាក់ស្តែង នៅក្រោយការចាកចេញរបស់បុរសសញ្ជាតិន័រវេស នៅចុងឆ្នាំ ២០២១ មក ខ្សែការពារ Harry Maguire ត្រូវបានគេប្រគល់តំណែងឱ្យជាប្រធានក្រុមថ្មី ជំនួសកីឡាករ Ashley Young ។
តែទោះជាយ៉ាងណាក៏ដោយ Solskjaer ថ្មីៗនេះបាននិយាយប្រាប់ The Athletic អំឡុងពេលលោកនៅកាន់តំណែង ដោយបានបង្ហើបថាមានកីឡាករក្នុងក្រុមមួយចំនួន បានបដិសេធឱកាសដើម្បីក្លាយជាប្រធានក្រុម។
មិនតែប៉ុណ្ណោះ លោក Solskjaer បាននិយាយថា ៖ “ខ្ញុំនឹងមិនបញ្ចេញឈ្មោះទេ ប៉ុន្តែខ្ញុំមានការខកចិត្តជាខ្លាំង នៅពេលកីឡាករពីររូប បានបដិសេធឱកាសធ្វើជាប្រធានក្រុម។ ខ្ញុំក៏ខកចិត្តផងដែរនៅពេលដែលអ្នកដទៃនិយាយថាពួកគេនឹងមិនចូលលេង ឬហ្វឹកហាត់សម្រាប់ក្រុមទៀតនោះឡើយ ព្រោះពួកគេចង់បង្ខំឱ្យមានការចាកចេញ ” ។
យ៉ាងណាមិញ បើតាមការបញ្ជាក់បន្ថែមពី The Sun បានបង្ហាញថាកីឡាករពីររូប ដែលបដិសេធឱកាសធ្វើជាប្រធានក្រុមម្ចាស់ជើងឯកអង់គ្លេស ២០សម័យនោះ គឺ Pogba និង Rashford ដែលម្នាក់ៗសុទ្ធតែមានហេតុផលផ្សេងគ្នា ៕
ប្រភព: Sportsmole