Diego Simeone រាប់ជាគ្រូកាន់ឆ្នាំយូរបង្អស់ហើយនៅក្លឹបអេស្ប៉ាញសព្វថ្ងៃ នេះជាមួយ Atletico Madrid បុរសសញ្ជាតិអាហ្សង់ទីន បានដឹកនាំតាំងឆ្នាំ ២០១១ មកម្ល៉េះ។ សមិទ្ធផលមកទល់សព្វថ្ងៃ ឈ្នះពានរង្វាន់ La Liga ២ លើក និង Europa League ២ លើកផងដែរ។
បច្ចុប្បន្នភាពបុរសវ័យ ៥៣ ឆ្នាំ ទើបតែបន្តកុងត្រាថ្មី ដល់ចុងខែមិថុនា ឆ្នាំ ២០២៧ ដោយពេលវេលានេះ ល្មមនឹងឲ្យលោកដឹកនាំក្លឹបក្រហមសចូលជិត ១៦ ឆ្នាំ ប្រសិនបញ្ចប់ត្រឹមពេលនោះ មិនមានការបន្តបន្ថែមទៀត។ អំពីសមាសភាពគ្រូថ្មី ដែល Simeone មើលឃើញជាមុន ថាសក្តិសមនឹងមកដឹកនាំក្លឹបអេស្ប៉ាញ គឺមាន ៣ រូប។
Simeone លើកឡើង៖ “ជាបេក្ខភាពល្អបំផុត មានដូច Klopp, Ancelotti និង Pochettino ជាអ្នកចាត់ការដែលខ្ញុំចង់ឲ្យដឹកនាំ Atletico”។ បន្តទៅ កីឡាករដែលលោកនៅចង់ដឹកនាំ មុនចូលនិវត្តពីអាជីព៖ “Messi និង Ronaldo គឺល្អបំផុត ខ្ញុំដូចមតិអ្នករាល់គ្នា មិនមានការប្រៀបធៀបអ្វីទេ”។
រំឭកស្ថិតិដឹកនាំជារួមក្លឹបម្ចាស់ដី Wanda Metropolitano អ្នកចាត់ការខាងលើ ឆ្លងកាត់ ៦៤៣ ប្រកួត ក៏ឈ្នះ ៣៨១ ស្មើ ១៤៥ និងចាញ់ ១១៧។ ខណៈនោះ ក្លឹបរបស់លោករកបានដល់ទៅ ១ ០៩២ គ្រាប់ និងរបូតទៅវិញ ៥២៧ គ្រាប់ផងដែរ៕
ប្រភព៖ SportBible