Cristiano Ronaldo ជាមនុស្សមានឥទ្ធិពលមួយរូបសម្រាប់បាល់ទាត់ក្នុងប្រទេសអារ៉ាប៊ីសាអូឌីត បាននិយាយឥតលាក់បាំង ថាសព្វថ្ងៃនៅទីនេះ បន្តទម្លាប់អាក្រក់មួយចំនួនដែលត្រូវតែកែប្រែ គ្រាន់មិនមានការបញ្ជាក់លម្អិតឡើយ ថាវាមានភាពខុសប្លែក ឬមិនប្រក្រតីអ្វីនោះ។
ជាការពិតមួយរយៈចុងក្រោយ សង្កេតឃើញកីឡាករជាច្រើនបានចាកចេញបន្តកន្ទុយគ្នា ហើយអ្នកចុងក្រោយគឺ Jordan Henderson ដែលមកចូលរួមបានជាង ៦ ខែ ក៏ផ្ទេរចេញពី Al-Ettifaq ស៊ូទៅយកលុយតិចពីក្លឹប Ajax នៅឯប្រទេសហូឡង់ជំនួសវិញ។ អ្នកផ្សេងទៀតគឺអាចជា Karim Benzema ក៏ជាលំដាប់ Superstar មួយរូបដែរ។
ទោះយ៉ាងណាថ្មីៗនេះ CR7 លើកឡើង៖ “មានកត្តាជាច្រើនដែលអាចឲ្យលីគមួយនេះពង្រឹងទៅមុខ ដូចខ្ញុំបាននិយាយពីមុន មានកត្តាជាច្រើនដែលអាចឲ្យល្អប្រសើរឡើង តែខ្ញុំគិតថាមនុស្សមានឥទ្ធិពលនៅពីក្រោយ នឹងអាចផ្លាស់ប្ដូរវប្បធម៌បាល់ទាត់មួយចំនួនដែលជាទម្លាប់មិនល្អ”។
លោកបន្ត៖ “ខ្ញុំគិតថាយើងនឹងឈានទៅដល់ចំណុចដែលអាចឲ្យអ្នករាល់គ្នានៅអារ៉ាប៊ីសាអូឌីតមានមោទកភាពឡើង ការវិនិយោគនៅទីនេះធំខ្លាំងណាស់ ដូច្នេះហេតុអ្វីមិនជឿថាវាអាចទៅរួច ដូចគ្នានឹងនៅឌូបៃ គ្រប់យ៉ាងគឺអាចផ្លាស់ប្តូរ ពួកគេសក្តិសមនឹងទទួលបានឱកាស”៕
ប្រភព៖ SportBible