អ្នកចាត់ការក្លឹប Aston Villa លោក Unai Emery បានសង្កត់ធ្ងន់ថា ដំណើរឈ្នះពានរង្វាន់នៅចក្រភពអង់គ្លេស គឺជារឿងដ៏ពិបាកធ្វើជាងនៅទីកន្លែងណាទាំងអស់ក្នុងពិភពលោកយើងនេះ។ ជាការលើកឡើងមុនការត្រៀមតតាំងក្លឹប Chelsea នៅជុំទី ៤ FA Cup ខាងមុខ។
បុរសវ័យ ៥២ ឆ្នាំ ដែលធ្លាប់ដឹកនាំក្លឹបបារាំងកន្លងមក ឈ្នះ Ligue 1, Coupe de France និង Coupe de la Ligue ដល់តែមកជាមួយក្លឹបនៅអេស្ប៉ាញ ក៏ឈ្នះដែរ ទាំងកាលនៅ Sevilla និង Villarreal គឺ UEFA Europa League យ៉ាងណាជាមួយ Villa Park មិនទាន់ស្គាល់ជាតិឈ្នះទេ កុំថាឡើយគ្រានៅដឹកនាំ Arsenal។
ហេតុនេះទើប Emery ហ៊ានលើកឡើង៖ “ការដែលឈ្នះពានរង្វាន់ណាមួយនៅទីនេះ ពិតជាពិបាកជាងប្រទេសដទៃណាទាំងអស់ ខ្ញុំពិតជាចង់ធ្វើអ្វីមួយ តែឱកាសដែលមាន គឺត្រូវប្រកួតប្រជែងដូចជាស្អែកនេះអ៊ីចឹង ខ្ញុំដឹងថាបានធ្វើរឿងផ្សេងគ្នានៅអេស្ប៉ាញ បារាំង ឬអង់គ្លេស ដែលវាជាបទពិសោធន៍សម្រាប់ខ្ញុំ”។
លោកបន្ត៖ “ឥឡូវនៅអង់គ្លេស ខ្ញុំអត់ទាន់បានសម្រេចអ្វីនៅឡើយទេ តាំងកាលនៅ Arsenal និងឆ្នាំមុននេះ នៅ Aston Villa ដូច្នេះសង្ឃឹមថានឹងអាចធ្វើវាបាន”។ បញ្ជាក់ថា យប់នេះនឹងមានការប្រកួតទល់តោខៀវ ក៏នឹងមានផ្សាយបន្តផ្ទាល់លើទំព័រ CTS SPORTS វេលាម៉ោង ០២:៤៥ នាទីទៀបភ្លឺ៕
ប្រភព៖ BeSoccer