ក្លឹបបាល់ទាត់នៅទូទាំងសកលលោកទាំងអស់បានចំណាយសរុប ៨,៨៨ ពាន់លានអឺរ៉ូកាលពីឆ្នាំទៅ ២០២៣ ដែលវាបានបំបែកតួលេខខ្ពស់បង្អស់ធ្លាប់កើតមានក្នុងឆ្នាំ ២០១៩ ច្រើនជាង ២ ពាន់លានអឺរ៉ូឯណោះ។ នេះបើតាមការកត់ត្រានិងចុះផ្សាយចេញពី FIFA។
វាក៏ហៅចូលជាតួលេខកើនឡើង ៤៨,១ ភាគរយ ធៀបនឹងតួលេខឆ្នាំចាស់ ២០២២។ នេះបើយើងបង្ហាញត្រួសៗវាក៏កើតចេញពីការផ្ទេរដូច Jude Bellingham ទៅ Real Madrid, Enzo Fernandez ទៅ Chelsea និង Harry Kane ទៅ Bayern Munich ជាដើម។
ហើយបើយើងនិយាយអំពីក្លឹបចាយក្រាស់ក្រែលបំផុត មាន Chelsea, Paris Saint-Germain, Liverpool, Real Madrid និង Bayern Munich ហើយផ្ទុយទៅវិញ បើយើងនិយាយដល់លីគណាទទួលបានប្រាក់ចំណូលពីការផ្ទេរចេញកីឡាករខ្ពស់ដាច់គេ គឺជាលីគអាល្លឺម៉ង់សរុប ១,២១ ពាន់លានអឺរ៉ូ។
ក្រៅពីនេះ FIFA ក៏បានកត់សម្គាល់នៅកំណើននៃបាល់ទាត់ផ្នែកនារីផងដែរ ក្នុងឆ្នាំ ២០២៣ មានក្លឹបចំនួន ៦២៣ ដែលផ្សារភ្ជាប់នឹងការដោះដូរ ឡើងពីតួលេខ ៥០៧ ក្នុងឆ្នាំចាស់។ ហើយមានកីឡាករ ១ ៨៨៨ រូប ផ្ទេរចេញពីប្រទេសមួយទៅកាន់ប្រទេសមួយទៀត កើនឡើងពី ១ ៥៧១ រូប ធៀបនឹងឆ្នាំ ២០២២៕
ប្រភព៖ BeSoccer