ក្លឹបបិសាចក្រហម Manchester United លេងមិនទាន់ស្គាល់ចាញ់នោះទេក្នុងឆ្នាំ ២០២៤ ពោល ៦ ប្រកួតចុងក្រោយរបស់គេ មានតែពាក្យថា ស្មើ និងឈ្នះ ឥតបរាជ័យ ឥឡូវក្នុងតារាង Premier League ឯណេះ ក៏បានរំកិលខ្លួនមកឈរលេខ ៦ មាន ៤១ ពិន្ទុ នៅចាញ់ក្លឹប Top 4 គឺ Spurs តែ ៦ ពិន្ទុ។
វាជាការកែប្រែលទ្ធផលដ៏ល្អមួយ បើធៀបនឹងចុងឆ្នាំចាស់ ២០២៣ ដែលក្លឹបដឹកនាំដោយអ្នកចាត់ការលោក Erik ten Hag ធ្លាក់ទៅលេខរៀងទី ៩ ទី ១០ ឯណោះ។ ទោះយ៉ាងណាងាកទៅអតីតជើងចាស់លោក Paul Scholes បានលើកទឹកចិត្តនិងជំរុញឲ្យក្លឹបបន្តទម្រង់បែបនេះទៀត ហើយក៏គួរអរគុណដល់ចំណែកតារាឆ្នើមចាស់វស្សាតំបន់ក្រោមផងដែរ។
នោះសំដៅទៅ Casemiro និង Raphael Varane។ សម្រង់សម្តីរបស់ Scholes៖ “ខ្ញុំទទួលអារម្មណ៍មួយថា រយៈពេល ២ ឬ ៣ សប្តាហ៍ចុងក្រោយនេះ ជាមួយកីឡាករដែលក្លឹបមាន យើងអាចមានលទ្ធភាពលោតចូលទៅក្នុង Top 4 បើតាមបទពិសោធន៍ដែលត្រលប់មកកាន់ក្រុមវិញ”។
លោកបន្ថែម៖ “ពួកគេមានកីឡាករវ័យក្មេងជាច្រើន តែត្រូវដឹងថា មាន Casemiro មាន Varane ជាអ្នកដែលបានបង្កើតភាពខុសប្លែក ក៏បន្ថែមគុណភាពមួយកម្រិតដែរ វាត្រង់ថាជួនកាលទៅមិនសំខាន់ពួកគេលេងរបៀបណាទេ តែសំខាន់ជាការប្រើឈ្មោះបន្លាចខាងក្រុមគូប្រជែង”៕
ប្រភព៖ Metro