ក្លឹបយក្សអាល្លឺម៉ង់បានដាក់តម្លៃខ្សែបម្រើ Joshua Kimmich របស់ខ្លួនមកហើយ បន្ទាប់លឺដំណឹងថាភាគីក្លឹបធំពីរនៅអេស្ប៉ាញមាន Barcelona និង Real Madrid ដាក់ក្រសែភ្នែកចាប់អារម្មណ៍ចង់បាន។ វាហាក់កាន់តែធ្វើឲ្យមើលឃើញ អនាគតរបស់ Kimmich ពិតមិនប្រាកដប្រជានោះទេ នាពេលវេលាខាងមុខ។
បើតាមសារព័ត៌មាន Kicker របស់អាល្លឺម៉ង់ចុះផ្សាយ ក្លឹប Barcelona ជាបេក្ខភាពធំបំផុត ត្រង់ពួកគេព្យាយាមចង់បាន Kimmich តាំងឆ្នាំទៅ តែចរចាមិនទទួលបានជោគជ័យ ក៏ដោយសារពេលនោះ ពាក់ព័ន្ធនឹងបញ្ហាកុងត្រារបស់តារាឆ្នើមខាងលើផង ទើបនាំឲ្យគ្រប់យ៉ាងត្រូវបានផ្អាក។
បកមកពេលវេលានេះវិញ គេហាក់ចាប់អារម្មណ៍ក្នុងការផ្ទេរចេញ តាមថាទៅមានដល់ ៥ ក្លឹប ដែលបាក់ចិត្តមកលើ Kimmich រួមទាំង Liverpool និង Manchester ទាំងពីរនៅឯអង់គ្លេសផងដែរ។ របាយការណ៍ចុងក្រោយ Bayern បានដាក់តម្លៃមកហើយ សម្រាប់កីឡាករប្រុងផុតកុងត្រានៅចុងខែមិថុនា ឆ្នាំ ២០២៥ ខាងមុខ។
នោះគឺប្រមាណ ៧០ ទៅ ៨០ លានអឺរ៉ូ ឬចូលល្បាក់ ៧៦ ទៅ ៨៧ លានដុល្លារអាមេរិក ប្រសិនជាបណ្តាក្លឹបណាមួយចង់បាន Kimmich ចេញពីក្របខ័ណ្ឌ Bundesliga។ បកទៅការចរចារវាងភាគីអ្នកមានបុណ្យ ដំណើរការដោះដូរស្មើឬថែមលុយបន្តិចបន្តួចក៏ទំនងអាចកើតមាន ត្រង់ក្លឹបដឹកនាំដោយអ្នកចាត់ការលោក Thomas Tuchel ក៏បានចាប់ចិត្តទៅលើ Ronald Araujo ដែលជាខ្សែការពារកំពុងលេចធ្លោនៅ Camp Nou៕
ប្រភព៖ Kicker