ឪពុកបង្កើតរបស់ Neymar Jr បានបដិសេធ ថាខ្លួនមិនជាប់ពាក់ព័ន្ធនឹងសកម្មភាពចុងក្រោយនេះទេ ពាក់ព័ន្ធនឹងការចំណាយប្រាក់ ដើម្បីលួស Dani Alves ឲ្យនៅក្រៅឃុំ។ នេះជាការឆ្លើយតបក្នុងសេចក្តីថ្លែងការណ៍បន្ទាប់មានផ្ទុះព័ត៌មានរសើបកាលពីថ្ងៃព្រហស្បតិ៍កន្លងទៅ។
ជាការពិត មានដំណឹងមកថា ឪពុករបស់ Neymar ដែលជាតំណាងភ្នាក់ងាររត់ការផ្ទាល់ខ្លួន របស់តារាឆ្នើមប្រេស៊ីល បានចាត់ចែងចេញលុយប្រមាណជាង ១ លានដុល្លារ ដើម្បីធានា Dani Alves ឲ្យនៅក្រៅឃុំ បន្ទាប់មានការកាត់ក្តី សម្រេចឲ្យគេជាប់ពន្ធនាគារច្រើនឆ្នាំ ពាក់ព័ន្ធនឹងករណីរំលោភទៅលើស្រ្តីមួយរូប។
ដល់តែថ្ងៃនេះ ស្រាប់ភាគីខាងឪពុក Neymar ចេញមករៀបរាប់៖ “ដូចអ្នករាល់គ្នាបានដឹង នៅពេលវេលាដំបូងនោះខ្ញុំពិតជាបានជួយ Alves តែមិនមានការផ្សារភ្ជាប់ទៅលើផ្លូវច្បាប់ ដល់ហើយលើកទីពីរនេះ ស្ថានភាពវាផ្សេងពីលើកទីមួយ ត្រង់តុលាការអេស្ប៉ាញបានសម្រេចរួចរាល់ហើយ”។
លោកបន្ត៖ “ដូច្នេះទាំងឈ្មោះរបស់ខ្ញុំ និងកូនប្រុសរបស់ខ្ញុំ មិនមានពាក់ព័ន្ធនឹងរឿងហេតុចុងក្រោយនេះឡើយ យ៉ាងណាខ្ញុំសង្ឃឹមថា Dani នឹងស្វែងរកចម្លើយ ដែលពួកគេចង់បានជាមួយក្រុមគ្រួសាររបស់គេ តែខាងក្រុមគ្រួសាររបស់យើង គឺបានចប់អស់ហើយជុំវិញរឿងរ៉ាវនានា”៕
ប្រភព៖ BeSoccer