អ្នកចាត់ការលោក Pep Guardiola បានបញ្ជាក់ជុំវិញការប្រកួតបរាជ័យក្រោមថ្វីជើងរបស់ Real Madrid កាលពីយប់មិញ ដែលចាញ់បាល់ប៉េណាល់ទីវគ្គ ៨ ក្រុមចុងក្រោយ ថាកីឡាកររបស់ខ្លួនខ្លះ ខំលេងទាំងរបួស ដល់ថ្នាក់សុំប្តូរចេញទៀតផង។
នោះគឺមកពីពួកគេជួបបញ្ហារបួសកំឡុងការប្រកួត ក៏ជាហេតុផលសម្រេចឲ្យគ្រូជ្រើសប្តូរពួកគេចេញ និងមិនបានដាក់ឲ្យស៊ុតប៉េណាល់ទីវគ្គសំខាន់ឡើយ។ រួមមាន Erling Haaland, Kevin de Bruyne និង Manuel Akanji ដែលសុទ្ធតែប្តូរចេញ កំឡុងការថែមម៉ោង ពោលមិនអាចលេងពេញ ១២០ នាទី។
អ្នកចាត់ការសញ្ជាតិអេស្ប៉ាញ បានពន្យល់យ៉ាងដូច្នោះថា៖ “ពួកគេទាំងអស់នោះ បានសុំខ្ញុំប្តូរចេញ ពួកគេថានឹងមិនអាចបន្តលេងទៀតទេ ខ្ញុំអត់មានការសោកស្តាយអ្វីនោះទេ អំពីអ្វីដែលយើងបានធ្វើវារួចរាល់នោះ ព្រោះយើងតែងតែព្យាយាមបង្កើតឱកាសឲ្យបានច្រើន ហើយរបូតឱកាសឲ្យបានតិច”។
លោកបន្តថា៖ “តែសោកស្តាយនៅទីបញ្ចប់យើងមិនអាចទទួលបានជ័យជម្នះ ពាក់ព័ន្ធនឹង Bernardo [អ្នកខកខានការស៊ុតប៉េណាល់ទី] គេជាអ្នកសុំខ្ញុំស៊ុត ហើយជាអ្នកសម្រេចខ្លួនឯងក្នុងការស៊ុតរបៀបនោះ”។ គួរឲ្យដឹងថា ឱកាសកាន់ពាន ៣/រដូវកាលទោលសម្រាប់ City បានបាត់បង់ហើយ នេះនៅសេសសល់ត្រឹម ២ ពានមាន FA Cup និងPremier League ជាក្តីសង្ឃឹមចុងក្រោយរបស់ពួកគេ៕
ប្រភព៖ SportBible