ក្លឹបសេះបង្កង់ Juventus ចាំបាច់ត្រូវទាត់ប្រាក់ទៅកាន់ Cristiano Ronaldo ប្រមាណ ៩,៧ លានអឺរ៉ូ ឬជាង ១០,៤ លានដុល្លារ ពាក់ព័ន្ធនឹងប្រាក់ឈ្នួលដែលនៅជាប់ជំពាក់កីឡាករកាលពីរដូវកាល ២០២០/២១។ នេះបើតាមការប្រកាសរបស់តុលាការនៅថ្ងៃពុធកន្លងទៅ។
តាមការតវ៉ារបស់ Ronaldo គឺក្លឹបនៅទីក្រុងទូរីន បានជាប់ជំពាក់ប្រាក់ឈ្នួល Ronaldo មួយចំនួនធំដូចតួលេខខាងលើបង្ហាញ ដែលនេះគិតក្រោយកាត់ពន្ធរួចរាល់។ ជាការពិត CR7 បានចាយពេល ៣ រដូវកាលនៅក្លឹបក្នុងប្រទេសអ៊ីតាលី ចន្លោះឆ្នាំ ២០១៨ ដល់ ២០២១ មុនជ្រើសការផ្ទេរទៅក្លឹបបិសាចក្រហម Man United នៅរដូវកាលបន្ទាប់។
យ៉ាងណាយើងមិនច្បាស់ថាក្លឹបមានមូលដ្ឋានក្នុងទីក្រុង Turin នឹងសម្រេចបែបណាទៀតទេ ពាក់ព័ន្ធនឹងការចោទប្រកាន់ខាងលើ ត្រង់កន្លងមកលើទីផ្សារភាគហ៊ុន ក្លឹបមានការខាតបង់ប្រាក់ដល់ទៅ ១២៣,៧ លានអឺរ៉ូ នៅហិរញ្ញវត្ថុប្រចាំរដូវកាល ២០២២/២៣។
ខណៈស្ថានភាពនៅចំណាត់ថ្នាក់ Serie A សព្វថ្ងៃក៏មិនជាល្អអីពេកនោះដែរ ដ្បិតកំពុងឈរលេខ ៣ មាន ៦៣ ពិន្ទុ ចាញ់ដាច់ធៀបនឹង AC Milan មាន ៦៩ ហើយ Inter Milan មាន ៨៣ ពិន្ទុ ដែលមានន័យសេះបង្កង់អស់ឱកាសប្រជែងពានរង្វាន់លីគកំពូលអ៊ីតាលីបាត់ទៅហើយ ក៏ជាការបាត់បង់ចំណូលមួយផ្នែកធំផ្សេងទៀត៕
ប្រភព៖ BeSoccer