ក្លឹប Atletico Madrid ត្រូវបានគេរាយការណ៍ថាកំពុងចាប់អារម្មណ៍ចង់បានកីឡាករ Alvaro Morata តាមរយៈការលក់ចេញកីឡាករ ២ រូបរបស់ជាថ្នូរប្តូរយកបុរសសញ្ជាតិអេស្ប៉ាញចេញពីក្លឹបតោខៀវ Chelsea។
ក្រុមរបស់លោក Diego Simeone ចង់ពង្រឹងបន្ថែមនៅតំបន់ប្រយុទ្ធតាមរយៈការយក Morata មកលេងនាពាក់កណ្តាលរដូវកាល ហើយផ្លាស់ប្តូរកីឡាករ Nikola Kalinic និង Gelson Martins ឲ្យទៅ Chelsea វិញ។ នេះបើយោងតាម Goal បានចុះផ្សាយ។
Nikola Kalinic បានមកលេងឲ្យ Atletico កាលពីទីផ្សារដោះដូររដូវក្តៅ ដោយបង្ហាញខ្លួន ៩ លើកក្នុងលីគទើបបំបែកបាន ២ គ្រាប់តែប៉ុណ្ណោះ។ ណាមួយទៀតដោយក្លឹបកំពុងជាប់ក្នុងលក្ខខណ្ឌកំណត់នៃការចំណាយថ្លៃពលកម្មហួសប្រមាណត្រឹម ២៥៩ លានអឺរ៉ូក្នុងមួយរដូវកាល បែបនេះចាំបាច់ត្រូវលក់នរណាម្នាក់ចេញសិនជាចាំបាច់។
សម្រាប់តោខៀវមុននេះក៏មានដំណឹងល្ហិចល្ហៀងថាទិញបាន Gonzalo Higuain រួចទៅហើយ ដោយរង់ចាំតែការប្រកាសដំណឹងផ្លូវការតែប៉ុណ្ណោះ បែបនេះបើពិតមែន នោះ Morata ក៏នឹងមានភាគរយច្រើនត្រូវដើរចេញពី Stamford Bridge នាទីផ្សារដោះដូរក្នុងខែមករានេះផងដែរ។
ប្រភព:SportBible