ប្រិយមិត្តប្រាកដជាស្គាល់ច្បាស់រួចមកហើយនូវឈ្មោះតារាសម្តែង ឈិន ឡុង ឬមានឈ្មោះផ្លូវការហៅថា Jackie Chan ដែលលោកជាសិល្បករក្បាច់គុនហុងកុង តួសម្តែង ផលិតករភាពយន្ត និងជាអ្នកចម្រៀង។
បុរសវ័យ ៦៦ ឆ្នាំរូបនេះ ចាប់ផ្តើមប្រលូកក្នុងវិស័យភាពយន្តតាំងពីអំឡុងឆ្នាំ ១៩៦០ ហើយបានចូលរួមសម្ដែងច្រើនជាង ១៥០ ភាពយន្តរួចមកហើយ។
បុរសដែលមានទ្រព្យសម្បត្តិប្រមាណ ៤០០ លានដុល្លាររូបនេះ លោកក៏ជាអ្នកគាំទ្រក្នុងវិស័យកីឡាបាល់ទាត់មួយរូបផងដែរ ដោយតាមរយៈបទសម្ភាសន៍មួយកាលពីឆ្នាំ ២០១៣ ជាមួយនឹងក្រុមការងារ FootballOverloadTV លោកបានឆ្លើយពាក់ព័ន្ធនឹងសំណួរចាក់ដោត ៣ រួមមានដូចខាងក្រោម៖
ក្លឹបបាល់ទាត់ណាដែលលោកស្រលាញ់បំផុត?
ឆ្លើយប្រាប់ទាំងមិនលាក់លៀម លោក Jackie Chan និយាយថា៖ “សម្រាប់ក្លឹបបាល់ទាត់គឺក្លឹប Manchester”។ ត្រង់ចម្លើយនេះលោកហាក់មានភាពស្ទាក់ស្ទើរ ដោយមិនបញ្ជាក់ច្បាស់ថាជា Manchester City ឬ Manchester United នោះទេ តែផ្អែកតាមការស្រាវជ្រាវលើប្រព័ន្ធអ៊ីនធឺណិត Jackie Chan ធ្លាប់លេចមុខជាមួយក្លឹប Manchester City កាលពីឆ្នាំ ២០១២ អំឡុងពេលក្រុមមេឃខៀវធ្វើទស្សនកិច្ចទៅកាន់ប្រទេសចិន។
កីឡាកររូបណាខ្លះដែលលោកស្រលាញ់បំផុត?
សំណួរមួយផ្សេងទៀត ពាក់ព័ន្ធនឹងកីឡាករដែលលោកស្រលាញ់ តារាសម្តែង ឈិន ឡុង បាននិយាយទាំងមិនស្ទាក់ស្ទើរ ដល់ឈ្មោះអតីតម្ចាស់អាវលេខ ៧ នៅ Man Utd ទាំងពីររូប នោះគឺ Cristiano Ronaldo និង David Beckham។
គិតថាក្រុមជម្រើសជាតិមួយណាដែលនឹងឈ្នះ World Cup ឆ្នាំ ២០១៤? (សំណួរដែលសួរនៅឆ្នាំ ២០១៣)
លោកបានឆ្លើយថា៖ “ខ្ញុំគិតថាអាចជាប្រេស៊ីល ហូលង់ ឬអាល្លឺម៉ង់ដែលនឹងឈ្នះ World Cup ឆ្នាំបន្ទាប់”។
ផ្សាភ្ជាប់នឹងលទ្ធផលដែល ឈិន ឡុងបានទស្សន៍ទាយ ក្នុងចំណោម ៣ ប្រទេសខាងលើ ក៏មានត្រូវមួយ ដោយនោះគឺក្រុមជម្រើសជាតិអាល្លឺម៉ង់ ដែលកាលពីរដូវក្តៅឆ្នាំ ២០១៤ នាវគ្គផ្តាច់ព្រ័ត្រ អាល្លឺម៉ង់បានយកឈ្នះអាហ្សង់ទីន ១-០៕
ប្រភព៖ FootballOverloadTV