Hazard និយាយអ្វីខ្លះពីអ្នកចាត់ការថ្មី ក្រោយរូបគេលេងជាកីឡាករបំរុង?

ខ្សែប្រយុទ្ធ Eden Hazard និយាយថា Chelsea អាចធ្វើបានគ្រប់យ៉ាង ដោយភាពអស្ចារ្យ ក្រោមការដឹកនាំរបស់លោក Marizio Sarri បន្ទាប់ពីតោខៀវបានយកឈ្នះ Arsenal ដោយលទ្ធផល ៣-២។

ខ្សែការពារ Marcos Alonso បានរកគ្រាប់បាល់ជ័យជំនះអោយ Chelsea នៅ៩នាទីមុនការប្រកួតបញ្ចប់ ក្នុងកីឡដ្ឋាន Stamford Bridge បន្ទាប់ពី កីឡាករ Henrikh Mkhitaryan និង Alex Iwobi របស់ Arsenal រកម្នាក់មួយគ្រាប់តាមស្មើ ពីរគ្រាប់ដែលរកបានដោយ Pedro និង Alvaro Morata របស់ក្រុមតោខៀវ ដែលបាននាំមុខ នៅក្នុងតង់ទី១។

នៅក្នុងជំនួបនោះ Hazard ត្រូវអង្គុយកៅអីបម្រុង មុនពេលរូបគេទទួលបានឱកាសប្ដូរចូល ហើយជួយបញ្ជូនបាល់អោយ Alonso រកបានបីពិន្ទុនៅក្នុងទឹកដីរបស់ខ្លួន។ ទោះបីជាគ្មានឈ្មោះក្នុងបញ្ជីជម្រើស១១នាក់ដំបូង ក៏ពិតមែន ប៉ុន្ដែខ្សែប្រយុទ្ធបែលហ្ស៊ិករូបនេះ បានលើកសរសើរអ្នកចាត់ការថ្មីរបស់ខ្លួន ដែលបានដឹកនាំក្រុមជំនួសលោក Antonio Conte សំរាប់រដូវកាលថ្មី ២០១៨/១៩។

ក្រោយចប់ការប្រកួត Hazard បានថ្លែងប្រាប់ BT Sport ថា៖ “វាជារឿងល្អដែលខ្ញុំលេងនៅលើទីលាន ជាងអង្គុយនៅលើកៅអីបម្រុង ប៉ុន្ដែកីឡាកររបស់យើង លេងបានល្អ ហើយប្រសិនបើខ្ញុំអាចបង្ហាញខ្លួនលើទីលាន ១៥ ទៅ ២០នាទី ខ្ញុំក៏នឹងខំអោយអស់ពីសមត្ថភាពរបស់ខ្ញុំផងដែរ។

“ថ្ងៃនេះ ខ្ញុំពិតជារំភើបដែលយើងបានទទួលជ័យជំនះ។ ខ្ញុំគិតថា[Sarri] ជាអ្នកចាត់ការ ដែលចង់អោយកីឡាករយើងគ្រប់គ្រងបាល់។ ខ្ញុំមិនអាចនិយាយអាក្រក់ពីរឿងនេះទេ ខ្ញុំគ្រាន់តែចង់ចូលលេង ហើយគ្រប់គ្រងបាល់នៅជើងរបស់ខ្ញុំ។

“យើងមានកីឡាករល្អៗ ហើយយើងអាចធ្វើរឿងដែលអស្ចារ្យ ដូច្នេះវាជារឿងល្អដែលមានអ្នកចាត់ការប្រភេទនេះ។ ខ្ញុំគិតថានៅ Premier League យើងមិនអាចមានឱកាសគ្រប់គ្រងបាល់បានច្រើននោះទេ។ គាត់ជាអ្នកចាត់ការដ៏អស្ចារ្យ ដូចដែលយើងធ្លាប់មានពីមុនមក ហើយពេលនេះ យើងរីករាយនឹងការទទួលបានជ័យជំនះក្នុងការប្រកួត”៕

ប្រភព៖ Goal

គ្រូបង្វឹក Sarri រំលាយចោលនូវវិន័យដ៏តឹងរ៉ឹងរបស់លោក Conte កាលដឹកនាំ Chelsea

អ្នកចាត់ការថ្មីក្លឹប Chelsea លោក Maurizio Sarri បានរំសាយវិន័យដ៏តឹងរឹងរបស់លោក Antonio Conte ដើម្បីបង្កើតបរិយាកាស លំហែអារម្មណ៍ដល់កីឡាករ។

លោក Conte បានដាក់វិន័យយ៉ាងតឹងរឹង សំរាប់កីឡាករចំពោះរបបអាហារដែលពួកគេទទួលទាន ហើយអោយកីឡាករស្នាក់នៅសណ្ឋាគាររបស់ Chelsea មួយយប់មុនពេលការប្រកួតនៅកីឡដ្ឋាន Stamford Bridge ចាប់ផ្ដើម។

ហើយបើយោងតាមកាសែត The Telegraph បានអោយដឹងថា អ្នកចាត់ការថ្មីរបស់ក្រុមតោខៀវលោក Sarri បានរៀបចំវិន័យថ្មី ក្នុងការដឹកនាំក្រុមដែលមានមូលដ្ឋាន នៅទីក្រុងឡុងដ៍ ដោយអនុញ្ញាតអោយកីឡាករ ជ្រើសរើសអាហារដើម្បីទទួលទាន តាមចិត្តចង់នៅជំរុំហ្វឹកហាត់ ហើយនឹងស្នាក់នៅផ្ទះរបស់ខ្លួន ហើយត្រលប់មកកីឡដ្ឋាន Stamford Bridge នៅថ្ងៃប្រកួត។

គ្រូបង្វឹកថ្មីរបស់ក្រុមតោខៀវរូបនេះ មានបំណងក្នុងការលុបចោលគោលការណ៍ ដ៏តឹងរឹងរបស់អតីតអ្នកចាត់ការ Conte ដើម្បីអោយកូនក្រុមរបស់លោក មានអារម្មណ៍ធូរស្បើយ បន្ទាប់ពីធ្វើមិនសូវបានល្អ សំរាប់ការប្រកួត Premier League កាលពីរដូវកាលមុន។

ក្រោយពីបានដឹកនាំក្រុមជោគជ័យក្នុងការប្រកួតបើកឆាកនៅ Premier League ទល់នឹងក្រុម Huddersfield ក្នុងលទ្ធផល ៣-០ រួចមក លោក Sarri នឹងដឹកនាំកូនក្រុមប្រកួត ជាមួយនឹងក្រុមកាំភ្លើងធំ Arsenal នៅក្នុងទឹកដី Stamford Bridge នៅថ្ងៃសៅរ៍ចុងសប្ដាហ៍នេះ៕

ប្រភព៖ Daily Mail

តោះមកមើល កីឡាករចំនូលថ្មី Kepa និង Kovacic ពាក់អាវលេខប៉ុន្មានខ្លះនៅ Chelsea?

ក្លឹបតោខៀវ Chelsea បានប្រកាសលេខអាវរបស់កីឡាករ សំរាប់រដូវកាល ២០១៨/១៩ សំរាប់ការប្រកួត Premier League ដែលទើបតែបានចាប់ផ្ដើម ហើយក្រុមតោខៀវនឹងប្រកួតក្រៅដីទល់នឹង Huddersfield។

Chelsea បានបញ្ជូនបញ្ជីកីឡាកររបស់ខ្លួន ទៅអោយ Premier League ហើយនៅក្នុងនោះក៏មានកីឡាករចំនូលថ្មីបំផុត ពីររូបជាមួយនឹងលេខថ្មីរបស់ពួកគេផងដែរ។

អ្នកចាំទីចំនូលថ្មី Kepa Arrizabalaga នឹងត្រូវទទួលបានអាវលេខ១ សំរាប់រដូវកាលថ្មីនេះ បន្ទាប់ពីរូបគេបានផ្ទេរពីក្លឹប Athletic Bilbao ក្នុងតំលៃបំបែកកំណត់ត្រាអ្នកចាំទី ៧១.៦លានផោន ហើយខ្សែបម្រើ Mateo Kovacic ដែលផ្ទេរមកពី Real Madrid ក្នុងលក្ខខណ្ឌខ្ចីជើង ត្រូវពាក់អាវលេខ១៧។

ដោយឡែក កីឡាករដែលបានត្រលប់មកកាន់ក្លឹប Ruben Loftus-Cheek នឹងពាក់អាវលេខ១២ ខណៈដែលអ្នកចាំទីអាហ្សង់ទីន Willy Caballero នឹងក្លាយជាម្ចាស់កម្មសិទ្ធអាវលេខ១៣ ហើយខ្សែប្រយុទ្ធ Alvaro Morata នឹងពាក់អាវលេខ ២៩ ដូចដែលក្លឹបបានប្រកាសកាលពីសប្ដាហ៍មុន។

ហើយខាងក្រោមនេះជាបញ្ជីកីឡាករទាំងអស់របស់ Chelsea សំរាប់រដូវកាលថ្មី ជាមួយនឹងលេខអាវរៀងៗខ្លួន៖

1 – Kepa Arrizabalaga

2 – Toni Rudiger

3 – Marcos Alonso

4 – Cesc Fabregas

5 – Jorginho

6 – Danny Drinkwater

7 – N’Golo Kante

8 – Ross Barkley

10 – Eden Hazard

11 – Pedro

12 – Ruben Loftus-Cheek

13 – Willy Caballero

14 – Tiemoue Bakayoko

15 – Victor Moses

17 – Mateo Kovacic

18 – Olivier Giroud

21 – Davide Zappacosta

22 – Willian

24 – Gary Cahill

27 – Andreas Christensen

28 – Cesar Azpilicueta

29 – Alvaro Morata

30 – David Luiz

31 – Rob Green

33 – Emerson

កីឡាករក្រោមអាយុ ២១ឆ្នាំ

19 – Tammy Abraham

20 – Callum Hudson-Odoi

44 – Ethan Ampadu

59 – Marcin Bulka

Kovacic ផ្ដាំផ្ញើសំដីមួយចំនួន បន្ទាប់ពីបង្ហាញខ្លួនអោយ Chelsea ជាផ្លូវការ

ខ្សែបម្រើក្រូអាត Mateo Kovacic បានបង្ហាញខ្លួនជាផ្លូវការ ក្នុងនាមជាកីឡាករក្រុមតោខៀវ Chelsea កាលពីថ្ងៃព្រស្បត្ត៍នេះ បន្ទាប់ពីបញ្ចប់សំនុំឯកសារផ្ទេរមកកាន់ទឹកដី Stamford Bridge ពីក្លឹប Real Madrid ក្នុងលក្ខខ័ណ្ឌខ្ចីជើងរយៈពេលវែង។

ខ្សែបម្រើវ័យ២៤ឆ្នាំរូបនេះ ត្រូវបានចចារក្នុងលក្ខខណ្ឌដោះដូរជាមួយ អ្នកចាំទី Thibaut Courtois ទៅទឹកដី Bernabeu ក្រោយពីរូបគេបានបង្ហាញខ្លួន ក្នុងជម្រើសដំបូងក្រោមការដឹកនាំរបស់លោក Zinedine Zidane បាន១០ប្រកួត កាលពីរដូវកាលមុន។

Kovacic បានថ្លែងប្រាប់ប្រព័ន្ធផ្សព្វផ្សាយរបស់ក្លឹបតោខៀវថា៖ “ខ្ញុំមានអារម្មណ៍រីករាយ និង រំភើបញាប់ញ័រ ដែលបានចូលរួមនៅទីនេះ ជាមួយ Chelsea។ វាជាអារម្មណ៍មួយដ៏អស្ចារ្យ ហើយខ្ញុំប្រឹងប្រែងអោយអស់ពីសមត្ថភាពសំរាប់ក្លឹបមួយនេះ។

“វាជាលីគថ្មីសំរាប់ខ្ញុំ ហើយការចាប់ផ្ដើមប្រាកដជាមានការលំបាក ប៉ុន្ដែខ្ញុំដឹងច្បាស់ថា គ្រូបង្វឹក ហើយនឹង មិត្តរួមក្រុមរបស់ខ្ញុំ នឹងជួយជ្រោមជ្រែងខ្ញុំជាមួយនឹងរដូវកាលដ៏អស្ចារ្យ។”

គួររំលឹកថា Kovacic បានផ្ទេរពីក្លឹបអ៊ីតាលី Inter Milan មកចូលរួមជាមួយ Real Madrid កាលពីឆ្នាំ ២០១៥ ក្នុងតំលៃ ៣០លានអឺរ៉ូ ហើយរូបគេចូលលេងបានទៀងទាត់ក្រោមការដឹកនាំរបស់លោក Rafael Benitez និង ត្រូវបានដាក់អោយចូលលេងដោយលោក Zidane សំរាប់រដូវកាលដំបូងរបស់ខ្លួននៅ Madrid ផងដែរ។

ក្រោយមក ខ្សែបម្រើរូបនេះ ហាក់មិនសូវមានឱកាសក្នុងការដណ្ដើមកៅអីជម្រើសដំបូង ក្រោមការដឹកនាំរបស់ អ្នកចាត់ការសញ្ជាតិបារាំងនោះទេ ដោយសារតែលោក Zidane ពេញចិត្តខ្សែបម្រើបីរូបគឺ Luka Modric, Casemiro និង Toni Kroos ជាជម្រើសដំបូងក្នងការប្រកួតនានា។

Kovacic បង្ហាញខ្លួនអោយ Real Madrid សរុប ១០៩ប្រកួត ហើយពាក់កណ្ដាលនៃការបង្ហាញខ្លួនរបស់គេ គឺក្នុងនាមជាកីឡាករបម្រុង។

អ្នកចាត់ការរបស់ក្លឹប Chelsea លោក Marina Granovskaia បានស្វាគមន៍ Kovacic យ៉ាងកក់ក្ដៅ ក្នុងការចូលរួមនៅទឹកដី Stamford Bridge ហើយលោកបានមានប្រសាសន៍ថា៖ “យើងពិតជារីករាយក្នុងការស្វាគមន៍ Mateo មកកាន់គ្រួសារ Chelsea។ គេគឺល្អបំផុតសំរាប់ពួកយើងសំរាប់រដូវកាលនេះ។

“របៀបលេងរបស់គេគឺត្រូវជាមួយនឹង របៀបដឹកនាំរបស់លោក Maurizio [Sarri] ដែលចង់អោយក្រុមលេង ហើយយើងជឿជាក់ថា រូបគេនឹងបង្ហាញអោយឃើញថាគេមានតំលៃសំរាប់ក្លឹប”៕

ប្រភព៖ AS

[វីដេអូ] Aguero ស៊ុតចូលពីរគ្រាប់អោយ Man City លើកពាន Community Shield

ខ្សែប្រយុទ្ធ Sergio Aguero រកគ្រាប់បាល់ពីរគ្រាប់អោយក្រុម Manchester City យកឈ្នះ Chelsea ក្នុងលទ្ធផល ២-០ លើកពាន Community Shield នៅក្នុងកីឡដ្ឋាន Wembley។

Aguero រកគ្រាប់ទី២០០របស់ខ្លួនអោយ Man City នៅនាទីទី ១៣ បន្ទាប់ពីខ្សែបម្រើវ័យក្មេង Phil Foden បញ្ជូនអោយយ៉ាងល្អ ហើយរូបគេរកបានមួយគ្រាប់បន្ថែមទៀតនៅក្នុងតង់ទី២ ដោយមានការបញ្ជូនពី ខ្សែបម្រើព័រទុយហ្គាល់ Bernardo Silva។

ដោយឡែក កីឡាករវ័យក្មេង Brahim Diaz និង Gabriel Jesus បានព្យាយាមរកគ្រាប់បាល់អោយក្រុមបន្ថែមទៀតប៉ុន្ដែ មិនអាចរកគ្រាប់បាល់បានដោយសារ មានការរារាំងពីអ្នកចាំទី Willy Caballero។

ក្រុមតោខៀវ Chelsea ដែលស្ថិតនៅក្រោមការដឹកនាំរបស់លោក Maurizio Sarri មិនទាន់បានមួយខែផងនោះ ហាក់លេងមិនបានល្អនៅតំបន់ប្រយុទ្ធ ដោយមានឱកាសស៊ុតចំគោលដៅតែម្ដងគត់ ដោយខ្សែប្រយុទ្ធវ័យ១៧ឆ្នាំ Hudson-Odoi ប៉ុន្ដែសង្រ្គោះបានដោយ អ្នកចាំទី Claudio Bravo។

គួររំលឹកថា ក្រុមរបស់លោក Sarri មិនបានវត្តមានរបស់តារាឆ្នើមនៅតំបន់ប្រយុទ្ធ Eden Hazard ដែលត្រូវបានអនុញ្ញាតអោយសំរាកបន្ទាប់ពីការប្រកួត World Cup ហើយនឹងត្រលប់មកហ្វឹកហាត់នៅ ថ្ងៃចន្ទនេះ។

ចំនែកឯក្រុមដែលដឹកនាំដោយលោក Pep Guardiola វិញត្រូវអវត្ដមាន កីឡាករឆ្នើមដូចជា Kevin de Bruyne, Raheem Sterling និង David Silva ប៉ុន្ដែ ក្រុមរបស់លោកគ្រប់គ្រងការប្រកួត បានយ៉ាងល្អដោយមិនអោយរបូតគ្រាប់បាល់ ហើយឈ្នះពានទី៣ របស់ក្រុមរាប់ចាប់តាំងពី៦ខែកន្លងទៅ។

សំរាប់ប្រកួតបន្ទាប់ក្រុមតោខៀវ នឹងត្រូវប្រកួតទល់នឹង Huddersfield នៅថ្ងៃសៅរ៍ចុងសប្ដាហ៍នេះ មុនពេលពួកគេទទួលស្វាគមន៍ក្រុមបារាំង Lyon ក្នុងជំនួបមិត្តភាពនៅទឹកដី Stamford Bridge នៅថ្ងៃអង្គារសប្ដាហ៍ក្រោយ។ ចំនែកឯ City ដែលជាក្រុមការពារជើងឯក វិញ ត្រូវប្រកួតទល់នឹង Arsenal ក្នុងជំនួបបើកឆាករបស់ខ្លួននៅ Premier League នៅថ្ងៃអាទិត្យចុងសប្ដាហ៍នេះ៕

ប្រភព៖ BBC

គ្រូបង្វឹកលោក Sarri បញ្ជាក់ជាថ្មីម្តងទៀតអំពីអនាគតរបស់ Willian នៅក្លឹប Chelsea

គ្រូបង្វឹកលោក Maurizio Sarri មិនរំពឹងថា Willian នឹងចាកចេញពីក្លឹប Chelsea នោះទេ បន្ទាប់ពីរូបលោកបានជួបពិភាក្សាជាមួយនឹងកីឡាករប្រេស៊ីលរូបនេះ ។

គួររបញ្ជាក់ថា Willian បានមកយឺតពេលប្រាំថ្ងៃសម្រាប់ការហ្វឹកហាត់ជាមួយក្រុមនៅមុនបើករដូវកាលថ្មី ដោយសារតែរូបគេមានបញ្ហាជាមួយនឹងលិខិតឆ្លងដែនរបស់គេ ។

យ៉ាងណាមិញខ្សែប្រយុទ្ធរូបនេះត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ប្តូរមួយដោយទទួលបានការចាប់អារម្មណ៍ពីក្លិប Real Madrid ដែលបានដេញថ្លៃ 100 លានផោនសម្រាប់រូបគេ និងអ្នកចាំទី Thibaut Courtois ។

យ៉ាងណាមិញលោក Sarri បាននិយាយថា ” ខ្ញុំបាននិយាយជាមួយគាត់អំពីការមកយឺតរបស់គាត់ ប៉ុន្តែមិនមែនសំដៅអំពីអនាគតរបស់គាត់ទេ ”  ។ ” វាជាការពិភាក្សាគ្នាដ៏ល្អមួយ ។ ហើយមិនមានបញ្ហាអ្វីជាមួយ Willian ទេ ។ ខ្ញុំគិតថាគាត់នឹងស្នាក់នៅបន្ត ។ ខ្ញុំមានទំនុកចិត្តខ្លាំងណាស់ ” ៕

ប្រភព: Daily Mail 

 

 

Morata បោះចោលអាវលេខ 9 ហើយចាប់យកលេខអាវថ្មីមួយទៀតនៅក្រុម Chelsea

កីឡាករ Alvaro Morata របស់ក្រុម Chelsea ត្រៀមបោះបង់លេខអាវចាស់របស់គេ ដោយធ្វើការផ្លាស់ប្តូរយកលេខអាវថ្មីមួយទៀតនៅក្រុម Chelsea សម្រាប់រដូវកាលខាងមុខនេះ ។

ជាក់ស្តែង Morata ពាក់អាវលេខ 9 នៅក្នុងរដូវកាលទី 1 របស់គេនៅទឹកដី Stamford Bridge ក្នុងរដូវកាល 2017/18 ប៉ុន្តែឥឡូវនេះរូបគេនឹងពាក់លេខ 29 សម្រាប់ក្លឹប បន្ទាប់ពីភរិយារបស់គេ Alice បានផ្តល់កំណើតដល់កូនប្រុសភ្លោះ Alessandro និង Leonardo កាលពីថ្ងៃអាទិត្យទី 29 ខែកក្កដា​កន្លងទៅ ។

គួររំលឹកថាកីឡាករសញ្ជាតិអេស្ប៉ាញដែលបានស៊ុតបញ្ចូលទី 15 គ្រាប់ក្នុងការបង្ហាញខ្លួន 48 ប្រកួតក្នុងរដូវកាលមុនកាលពីរដូវកាលមុនរូបនេះ ត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ប្តូរចេញពីក្រុមតោខៀវនៅរដូវក្តៅនេះ ដោយអតីតក្លឹបរបស់គេ Juventus និងក្រុម AC Milan ត្រូវបានគេជឿថាកំពុងធ្វើការចាប់អារម្មណ៍លើរូបគេ ។

ប៉ុន្តែទោះជាយ៉ាងណាក៏ដោយការផ្លាស់ប្តូរលេខរថ្មីបស់គេនេះគឺបានបង្ហាញថា Morata  មិនចង់ចាកចេញទៅណាពីក្លឹប Chelsea នោះទេ ៕

ប្រភព: Mirror 

 

មិនចង់អោយក្លឹបផ្សេងឆក់យកតារាឆ្នើមមួយរូប Chelsea ត្រៀមកុងត្រាថ្មី ដែលមានតំលៃ ១០០លានដុល្លារ

ប្រធានក្លឹបតោខៀវ Chelsea លោក Roman Abramovich ត្រូវបានគេចោទប្រកាន់ថាបានព្យាយាមលក់តារាឆ្នើមរបស់ក្លឹប សំរាប់រដូវក្ដៅនេះ ប៉ុន្ដែម្ចាស់ក្លឹបរូបនេះ ស្វះស្វែងរកគ្រប់មធ្យោបាយដើម្បីអោយ ខ្សែបម្រើ N’Golo Kante បន្ដនៅទឹកដី Stamford Bridge ខណៈដែល Barcelona និង Paris Saint-Germain កំពុងប្រជែងគ្នាដណ្ដើមកីឡាករបារាំងរូបនេះ។

Kante បានជួយអោយក្រុមជម្រើសជាតិបារាំង លើកពាន World Cup ដែលធ្វើអោយរូបគេត្រូវបានទទួលស្គាល់ថាជាខ្សែបម្រើការពារល្អបំផុតមួយរូប នៅក្នុងព្រឹត្តិការណ៍នោះ។ ដូច្នេះហើយបានជា អ្នកចាត់ការក្លឹបថ្មីលោក Maurizio Sarri មិនចង់បាត់បង់រូបគេនោះឡើយ។

ក្លឹប Chelsea មានគម្រោងផ្ដល់កុងត្រាថ្មីទៅអោយ Kante ដែលធ្វើអោយរូបគេក្លាយជាកីឡាករដែលទទួលបានថ្លៃពលកម្មច្រើនបំផុត ក្នុងចំនោមកីឡាករបស់ក្លឹប ពោលគឺច្រើនជាងថ្លៃដែល Hazard ទទួលបានទៅទៀត។

ហើយបើយោងតាមប្រភពកាសែត The Times បានអោយដឹងថា សំរាប់កុងត្រាថ្មីរយៈពេល ៥ឆ្នាំ Kante នឹងទទួលបានប្រហែលជិត ១០០លានដុល្លារ ដលមានន័យថា ក្នុងមួយសប្ដាហ៍គេទទួលបាន ៣៨០០០០ដុល្លារ ដែលច្រើនជាង Hazard ដែលជាមិត្តរួមក្រុមរបស់គេ ៩០០០០ដុល្លារ។

ខ្សែបម្រើបារាំង នឹងរកចំនូលបាន ២០លានដុល្លារក្នុងមួយរដូវកាល រហូតដល់ឆ្នាំ ២០២៣ ដែលកុងត្រាថ្មីនេះ អាចធ្វើអោយក្លឹបបារាំង PSG ដកខ្លួនពីការចង់បាន Kante ដើម្បីពង្រឹងក្រុមរបស់ពួកគេ ក្នុងការប្រជែងពាន UEFA Champions League សំរាប់រដូវកាលថ្មីនេះ៕

ប្រភព៖ Sport English

Chelsea មិនគួរលក់ Hazard នោះទេ ទោះ Real Madrid អោយតំលៃបំបែកកំណត់ត្រាក៏ដោយ – Tony Dorigo

អតីតខ្សែការពាររបស់ក្លឹបតោខៀវលោក Tony Dorigo ជឿជាក់ថា Chelsea មិនគួរលក់ខ្សែប្រយុទ្ធឆ្នើម Eden Hazard នោះទេ បើទោះបីជា Real Madrid ដាក់សំនើរបំបែកកំណត់ត្រា ២៦០លានដុល្លារក៏ដោយ។

Hazard គឺជាកីឡាករគោលដៅដ៏សំខាន់មួយរបស់ Real Madrid ដើម្បីជំនួសខ្សែប្រយុទ្ធ Cristiano Ronaldo ផ្លាស់ទៅលេងអោយ Juventus ហើយខ្សែប្រយុទ្ធបែលហ្ស៊ិកធ្វើបានល្អ ក្នុងការប្រកួត World Cup ដែលធ្វើអោយ ក្លឹបយក្សអេស្ប៉ាញ ប្រាថ្នាចង់បានរូបគេកាន់តែខ្លាំង។

មិនតែប៉ុណ្ណោះ ខ្សែប្រយុទ្ធវ័យ២៧ឆ្នាំរូបនេះ បានបង្ហើបជាច្រើនលើកមកហើយថា រូបគេមានបំណងចង់លេងអោយ Real Madrid នៅថ្ងៃណាមួយ ហើយក្នុងរដូវកាលនេះទៀតសោត ក្លឹបតោខៀវមិនអាចលេងពានរង្វាន់អឺរ៉ុប Champions League បាននោះទេ ហើយគេរំពឹងថា Hazard អាចនឹងសំរេចចិត្តដើរចេញពីទឹកដី Stamford Bridge ក្រោយរួមរស់នៅទីនោះ អស់រយៈពេល ៦ឆ្នាំ។

ប៉ុន្ដែអតីតកីឡាកររបស់ Chelsea លោក Dorigo ដែលបានបង្ហាញខ្លួន ១៤៦ ប្រកួតអោយ តោខៀវ បានទទូចអោយក្លឹប គួរបដិសេធរាល់សំនើរពី Real Madrid ក្នុងការចង់បាន Hazard មិនខ្វល់ថាតំលៃថ្លៃប៉ុណ្ណានោះទេ។

អតីតខ្សែការពាររូបនេះ បានថ្លែងប្រាប់កាសែត talkSPORT ថា៖ “ទឹកប្រាក់ ២០០លានផោន គឺពិតជាច្រើនខ្លាំងណាស់ ប៉ុន្ដែបើដក Modric ម្នាក់ចេញ Hazard គឺជាកីឡាករល្អបំផុតប្រចាំ ព្រឹត្តិការណ៍ World Cup។ គេមានវ័យ២៧ឆ្នាំ ហើយកាលពីពីរឆ្នាំមុន គេជាកីឡករល្អបំផុតនៅក្នុងលីគ ហើយបច្ចុប្បន្នទម្រង់លេងល្អរបស់គេ គ្មាននរណាអាចបញ្ឈប់បាននោះទេ។ Hazard គឺជាកីឡាករល្អបំផុតមួយរូប ដែលអ្នកត្រូវការ”៕

ប្រភព៖ talkSPORT

[ផ្លូវការ] Chelsea ប្រកាសតែងតាំងអ្នកចាត់ការថ្មី ក្រោយបណ្ដេញលោក Conte

អតីតអ្នកចាត់ការក្លឹប Napoli លោក Maurizio Sarri ត្រូវបានតែងតាំងជាអ្នកចាត់ការថ្មីរបស់ Chelsea បន្ទាប់ពីក្លឹបបានបញ្ដេញលោក Antonio Conte កាលពីថ្មីៗនេះ។

លោក Conte បានចាកចេញពីក្លឹបកាលពីថ្ងៃសុក្រកន្លងទៅ បន្ទាប់ពីដឹកនាំក្រុមបានពីររដូវកាល ដែលបានជួយតោខៀវអោយឈ្នះពាន Premier League មួយ និង FA Cup មួយ។

ដោយឡែកសំរាប់អ្នកចាត់ការថ្មីលោក Sarri បានជួយអោយ Napoli ឈរនៅលេខ២នៅលីគកំពូលអ៊ីតាលី ហើយបានសំរេចចិត្តចាកចេញពីក្លឹបកាលពីខែឧសភាកន្លងទៅ ហើយបានចូលខ្លួនមកដឹកនាំក្រុមតោខៀវជាផ្លូវការ ជំនួសលោក Conte៕