អ្នកគាំទ្រថៃមានទឹកមាត់លេប បើធៀបស្ថិតិប្រកួតជាមួយឥណ្ឌូណេស៊ីក្នុងពាន AFF Suzuki Cup

ក្រុមបាល់ទាត់ជម្រើសជាតិថៃ បានឆ្លងទៅកាន់វគ្គផ្ដាច់ព្រ័ត្រ AFF Suzuki Cup 2020 បន្ទាប់ពីយកឈ្នះវៀតណាមក្នុងវគ្គពាក់កណ្ដាលផ្ដាច់ព្រ័ត្រ ដោយលទ្ធផលសរុបទាំងពីរជើង​ ២-0។ ក្នុងវគ្គពាក់កណ្ដាលផ្ដាច់ព្រ័ត្រ ក្រុមដំរីសឹកថៃ ទទួលជ័យជម្នះ ២-០ កាលពីជើងទី១ ហើយស្មើ ០-០ ក្នុងជើងទី២។

ពួកគេនឹងឡើងទៅជួប ឥណ្ឌូណេស៊ីដែលទើបនឹងយកឈ្នះសិង្ហបុរីក្នុងវគ្គពាក់កណ្ដាលផ្ដាច់ព្រ័ត្រ ជាមួយលទ្ធផលសរុប ៥-៣។ នេះជាការជួបគ្នាលើកទី៤ ក្នុងវគ្គផ្ដាច់ព្រ័ត្ររវាងក្រុមទាំងពីរក្នុងព្រឹត្តិការណ៍ ពានរង្វាន់បាល់ទាត់ជម្រើសជាតិអាស៊ីអាគ្នេយ៍។

រំឭកកាលប៉ះគ្នាបីលើកកន្លងមកក្នុងវគ្គផ្ដាច់ព្រ័ត្រ ក្រុមឥណ្ឌូណេស៊ី បរាជ័យទាំងបីលើក។ ក្នុងឆ្នាំ២០០០ ថៃបានយកឈ្នះ ៤-១ ហើយបានយកឈ្នះដោយបាល់ប៉េណាល់ទីកាត់សេចក្ដី ៤-២ ក្នុងឆ្នាំ២០០២ បន្ទាប់ពីបញ្ចប់លទ្ធផលក្នុងការប្រកួត១២០នាទី ២-២។

ជួបគ្នាក្នុងឆ្នាំ២០១៦ ការប្រកួតផ្ដាច់ព្រ័ត្រត្រូវបានរៀបចំលេងពីរជើង ដោយជើងទី១ ឥណ្ឌូណេស៊ីឈ្នះ ២-១ ប៉ុន្ដែពួកគេនៅតែមិនអាចក្លាយជាជើងឯក ក្រោយចាញ់ក្នុងជើងទី២ ២-០ (សរុបលទ្ធផលទាំងពីរជើងថៃឈ្នះ ៣-២)។

ទោះយ៉ាងណាក្ដី សម្រាប់ការជួបតតាំងគ្នាលើកនេះ មិនដឹងថា ឥណ្ឌូណេស៊ី អាចស្គាល់ពាក្យថាជាជើងឯកលើកដំបូង ឬបន្ដឈរជាក្រុមជើងឯករងតទៅទៀត ដ្បិតការឈានដល់វគ្គផ្ដាច់ព្រ័ត្រ៥លើកកន្លងមក ពួកគេមិនទាន់ស្គាល់ជ័យជម្នះនៅឡើយទេ ខណៈថៃដែលជាក្រុមជោគជ័យបំផុតក្នុងពានរង្វាន់នេះ បានឆ្លងដល់វគ្គផ្ដាច់ព្រ័ត្រ៨លើក និងក្លាយជាជើងឯក៥លើក៕

ប្រភព៖ Wikipedia

អានអត្ថបទបន្ទាប់៖ គ្រូធំ Rangnick បង្ហើបថាកូនក្រុមម្នាក់ និយាយត្រង់ៗថាចង់ចាកចេញពីក្លិប

ខ្សែប្រយុទ្ធ Anthony Martial បាននិយាយផ្ទាល់ប្រាប់អ្នកចាត់ការ Manchester United លោក Ralf Rangnick ថាគេមានបំណងចង់ចាកចេញពីក្លិប។

លោក​ Rangnick បានបង្ហើបឱ្យដឹងថា លោកបាននិយាយរយៈពេលយូរកាលពីថ្ងៃពុធ ជាមួយខ្សែប្រយុទ្ធវ័យ២៦ឆ្នាំ ដែលប្រាប់លោកថា វាជាពេលដែលត្រូវមានការផ្លាស់ប្ដូរ។

Martial មានឱកាសបង្ហាញខ្លួនក្នុងជម្រើស១១នាក់ដំបូងបានតែពីរលើប៉ុណ្ណោះ ក្នុងពានរង្វាន់លីគកំពូលអង់គ្លេសក្នុងរដូវកាលនេះ ហើយរកគ្រាប់បាល់បានមួយគ្រាប់។

ទោះបីជាគេមានបំណងចង់ចាកចេញពី Old Trafford លោក Rangnick បានបញ្ជាក់ប្រាប់ក្លិបថា លោកមិនទាន់ទទួលបានសំណើណាមួយសម្រាប់ខ្សែប្រយុទ្ធបារាំងនៅឡើយទេ។

លោក​Rangnick បាននិយាយថា៖ “គេបានពន្យល់ប្រាប់ខ្ញុំថាគេបាននៅ Manchester United ៧ឆ្នាំហើយមកទល់នឹងពេលនេះ ហើយគេមានអារម្មណ៍ថាវាជាពេលដ៏សមរម្យសម្រាប់ការផ្លាស់ប្ដូរ ដើម្បីទៅកន្លែងណាផ្សេង”៕

ប្រភព៖ BBC