United ត្រូវអស់លុយជាង១០លានដុល្លារ ក្រោយពី Martial រកបានមួយគ្រាប់ជួយក្រុមយកឈ្នះ Newcastle

ការវាយបកយកឈ្នះក្រុម Newcastle United របស់ Manchester United ជារឿងមួយដែលក្លឹបត្រូវការ ដើម្បីបន្ដឱកាសប្រជែងជាមួយនឹងក្រុម ដទៃផ្សេងទៀតនៅ Premier League ប៉ុន្ដែគ្រាប់បាល់របស់ ខ្សែប្រយុទ្ធ Anthony Martial ធ្វើអោយក្លឹបបិសាចក្រហម ត្រូវចំណាយជាង១០លានដុល្លារ។

United ត្រូវបានក្រុមភ្ញៀវនាំមុខ ២-០ ត្រឹម១០នាទីដំបូង នៅក្នុងការប្រកួតនៅទឹកដី Ol Trafford ប៉ុន្ដែកូនក្រុមរបស់លោក Jose Mourinho បានវាយបក៣គ្រាប់មកវិញ នៅ២០នាទីមុនការប្រកួតបញ្ចប់ ដោយទទួលបានលទ្ធផល ៣-២។

បាល់គ្រាប់ទី២ របស់ United រកបានដោយ Martial ដោយរូបគេស៊ុតបាល់កោងបានយ៉ាងល្អ តាមស្មើក្រុមភ្ញៀវ មុនពេលដែលខ្សែបម្រើ Juan Mata ស៊ុតបញ្ចូលទីដោយបាល់ហ្វ្រីឃីគ និង ក្រោយពី Alexis Sanchez តែតបញ្ចូលទីចុងម៉ោង ដែលជាគ្រាប់បាល់ជ័យជំនះ។

ហើយគ្រាប់បាល់ទី២ ដែលរកបានដោយខ្សែប្រយុទ្ធបារាំងរូបនេះ បានធ្វើអោយ United ត្រូវចំនាយ ៧.៧លានផោន(ប្រមាណជាង ១០លានដុល្លារ) ដោយសារតែលក្ខខណ្ឌដោះដូរជាមួយនឹងក្លឹប Monaco កាលពីឆ្នាំ ២០១៥។

United បានចំណាយ ៥០លានដុល្លារ ក្នុងការចុះហត្ថលេខានាំយក Martial ប៉ុន្ដែក្នុងកិច្ចព្រមព្រៀងនោះ ក៏មានរាប់បញ្ចូលនូវលក្ខខណ្ឌមួយចំនួន ដែលនាំអោយក្លឹបអង់គ្លេសត្រូវចំណាយសរុបប្រមាណ ៨១លានដុល្លារ។

ហើយក្នុងចំនោមលក្ខខណ្ឌនោះ United បានព្រមព្រៀងចំណាយអោយ Monaco ១០លានដុល្លារ ប្រសិនបើខ្សែប្រយុទ្ធបារាំង អាចរកគ្រាប់បាល់បាន ២៥គ្រាប់នៅក្នុងលីគកំពូលអង់គ្លេស មុនពេលបិទរដូវកាល ២០១៨/១៩។

គួររំលឹកថា Monaco ត្រូវរង់ចាំទឹកប្រាក់ដែលនឹងទទួលបានជាង១០ខែមកហើយ មុនពេលដែល Martial អាចរកគ្រាប់បាល់ទល់នឹង Newcastle ដោយគ្រាប់បាល់ចុងក្រោយ ដែលគេរកបាននៅ Premier League នោះគឺនៅខែមករា ក្នុងជំនួបជាមួយនឹងក្រុម Burnley៕

Sanchez តែតមួយក្បាលចុងម៉ោង ជួយ United ស្គាល់រសជាតិជ័យជំនះ

ប្រភព៖ Daily Mail