នាវេលាម៉ោង ០២:០០ នាទីរំលងអាធ្រាត្រ ឈានចូលព្រឹកថ្ងៃព្រហស្បតិ៍ទី ៦ ឧសភា ក្រុមតោខៀវ Chelsea នឹងបើកកីឡដ្ឋាន Stamford Bridge ស្វាគមន៍ក្រុមស្តេចស Real Madrid ដែលជាប្រកួតជើងទី ២ វគ្គពាក់កណ្តាលផ្តាច់ព្រ័ត្រ UCL មានផ្សាយផ្ទាល់លើទំព័រ CTS Sports។
មុនឈានដល់ការប្រកួតខាងក្រុម Madrid ហាក់ឲ្យតម្រុយអវិជ្ជមានជាច្រើន ជាពិសេសគឺតំបន់ការពារក្រោម ដែលទំនងជាខកខានកីឡាករសំខាន់ដល់ទៅ ៣ រូបឯណោះ។ តាមការបញ្ជាក់ចុងក្រោយនេះគឺច្បាស់ការមួយរូបហើយថា Raphael Varane នឹងមិនអាចវិលត្រលប់មកជួយក្រុមនៅការប្រកួតជើងទី ២ ខាងមុខនេះបានទេ។
បញ្ជាក់ពីក្លឹបជុំវិញស្ថានភាពរបស់កីឡាករបារាំង៖ “បន្ទាប់ពីការធ្វើតេស្តទៅលើកីឡាករនៅថ្ងៃនេះ យើងអាចសន្និដ្ឋានបានថា Varane មានរបួសសាច់ដុំ”។
យ៉ាងណា ២ រូបឯទៀតមាន Sergio Ramos គឺយើងមិនទាន់ទទួលបានដំណឹងច្បាស់ការនៅឡើយ ស្របពេលដែល Marcelo គេជាប់ភារកិច្ចនៅឯប្រទេសអេស្ប៉ាញ ហើយតាមដំណឹងកន្លងមកគឺគេអាចនឹងហោះត្រង់មកទឹកដីអង់គ្លេសតាមយន្តហោះឯកជននៅថ្ងៃប្រកួតតែម្តង។ រំឭកថាកាលពីប្រកួតជើងទី ១ នៅទឹកដីអេស្ប៉ាញក្រុមទាំងពីរបញ្ចប់ត្រឹមលទ្ធផលស្មើ ១-១៕
ប្រភព៖ Metro
អានអត្ថបទបន្ទាប់៖ ភ្ញាក់ផ្អើល! ពេលដឹង Chelsea ធ្លាប់ជួបពិភាក្សាជាមួយភ្នាក់ងារតារាឆ្នើម Real រូបនេះ អំឡុងប៉ះគ្នាក្នុងពាន UCL
ក្រុមតោខៀវ Chelsea ត្រូវបានគេរាយការណ៍ថាបានជួបជាមួយបងប្រុស និងជាភ្នាក់ងារផ្ទាល់របស់ខ្សែការពារក្រុម Real Madrid កីឡាករ Sergio Ramos ក្នុងអំឡុងពេលនៃការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ក្របខ័ណ្ឌ Champions League ជើងទី ១ នៅប្រទេសអេស្ប៉ាញនាពេលកន្លងទៅ ។
ជាក់ស្តែងនៅលីគកំពូលអង់គ្លេសមួយនេះ បានឆ្លៀតឱកាសចូលជួបពិភាក្សាជាមួយលោក Rene Ramos ជុំវិញកិច្ចព្រមព្រៀងដែលអាចធ្វើបានមួយសម្រាប់ប្រធានក្រុម Madrid កីឡាករ Ramos នៅរដូវក្តៅខាងមុខ ។
យ៉ាងណាមិញក្រុម Chelsea ត្រូវគេរាយការណ៍ថាមានបំណងពង្រឹងតំបន់ការពាររបស់ខ្លួន ឱ្យកាន់តែមានភាពរឹងមាំបន្ថែមទៀតនៅរដូវកាលក្រោយ ហើយ Ramos នៅតែត្រូវគេចាត់ទុកថាជាកីឡាករដ៏ឆ្នើមបំផុតមួយរូប សម្រាប់តំណែងនេះ បើទោះបីជាគាត់មានអាយុច្រើនហើយក៏ដោយ ។
រំលឹកថាកីឡាករវ័យ ៣៥ ឆ្នាំរូបនេះ បានក្លាយជាផ្នែកសំខាន់បំផុតសម្រាប់ក្រុម Real នៅរដូវកាលនេះ ហើយគាត់ក៏ជាសមាជិកមិនអាចខ្វះបានមួយនៅក្រុមជម្រើសជាតិអេស្ប៉ាញផងដែរ ដូច្នេះវាច្បាស់ណាស់ថា Ramos នៅតែអាចមានសមត្ថភាពលេងឲ្យក្រុមតោខៀវ Chelsea បានមួយឆ្នាំឬ ២ ឆ្នាំទៀត បើសិនបើគាត់យល់ព្រមផ្លាស់មកទឹកដី Premier League នោះ ។
ហើយមិនតែប៉ុណ្ណោះ វានៅតែត្រូវបានគេមើលឃើញថាប្រសិនបើ Ramos មិនព្រមបន្តកុងត្រាថ្មី ដែលកៀកនឹងបញ្ចប់ជាមួយក្រុម Madrid ទេនោះ វាអាចជាឱកាសដ៏ធំមួយសម្រាប់ Chelsea ស្របពេលពួកគេកំពុងមានការរីកចម្រើនលើកិច្ចពិភាក្សានាពេលកន្លងទៅ ជាមួយខ្សែការពារកំពូលរូបនេះផងដែរ ៕
ប្រភព: Cuaghtoffside