Saul Niguez ចំណូលថ្មីរបស់ក្លឹបតោខៀវ Chelsea ដែលទើបតែខ្ចីជើងពី Atletico Madrid បានបង្ហើបពីអារម្មណ៍ភ្ញាក់ផ្អើ.ល ពេលខ្លួនមកហ្វឹកហាត់ដំបូងជាមួយក្លឹប។ នោះគឺជាមួយគុណភាពដ៏គួរឲ្យចាប់អារម្មណ៍ របស់មិត្តរួមក្រុមថ្មី ២ រូប។
បុរសវ័យ ២៦ ឆ្នាំ មិនទាន់បានចូលលេងពេញជើងស្រួលបួលនៅឡើយឲ្យក្លឹបម្ចាស់ដី Stamford Bridge តែតាមការបញ្ជាក់ជាមួយលោក Fabrizio Romano កន្លងទៅ Saul និយាយពីឈ្មោះរបស់ Romelu Lukaku និង Thiago Silva ថាជាកីឡាករធ្វើឲ្យខ្លួនមានអារម្មណ៍ភ្ញាក់ផ្អើ.លបំផុត។
អតីតកីឡាករ Atletico និយាយ៖ “ខ្ញុំស្គាល់កីឡាករមួយចំនួននៅទីនេះដែរ ហើយក៏ធ្លាប់តាមដាន Premier League និង Chelsea ពីមុនមកច្រើនដែរ ដូច្នេះហើយខ្ញុំស្គាល់កីឡាករជាច្រើននៅទីនេះ តែនិយាយពី Lukaku គឺមិនសូវទេ ព្រោះអីខ្ញុំមិនសូវមើល Serie A ហើយក៏មិនដែលលេងទល់គេពីមុនមកដែរ”។
លោកបន្ថែម៖ “តែគេរឹងមាំខ្លាំងណាស់ ហើយខ្ញុំគិតថាឆ្នាំនេះកាលនៅ Serie A គេធ្វើបាននៅកម្រិតដ៏ខ្ពស់មួយ មួយផ្សេងទៀតគឺខ្ញុំភ្ញាក់ផ្អើ.លជាមួយការហ្វឹកហាត់របស់ Thiago Silva ដោយគាត់ជាមនុស្សមានវ័យ ៣៦ ឆ្នាំទៅ តែគាត់នៅតែហ្វឹកហាត់ដូចលក្ខណៈអាជីពជាមួយពួកយើង គាត់ខិតខំមិនឲ្យមានរបួ.ស ហើយតែងតែផ្តោតជានិច្ច លើសពីនេះគាត់ឈ្លាសវៃនិងយល់ពីការប្រកួតបានល្អខ្លាំងណាស់”៕
ប្រភព៖ Metro
អានអត្ថបទបន្ទាប់៖ ក្រៅពីប្រាក់ពលកម្ម Messi នៅបានភាគលាភជាង ១ លានដុល្លារទៀតពីរឿងនេះ នៅក្លឹប PSG
កិច្ចព្រមព្រៀងនៃការផ្ទេររបស់ Lionel Messi មកកាន់ក្លឹបបារាំង Paris Saint-Germain លើសុពលភាពកុងត្រារយៈពេល ២ ឆ្នាំ និងសិទ្ធបន្តថ្មី ១ ឆ្នាំកន្លងទៅនេះ ត្រូវបានប្រភពគួរឲ្យទុកចិត្ត L’Equipe ទម្លាយចេញនៅតម្លៃកិច្ចព្រមព្រៀងនោះមកហើយ។
លើសពីតម្លៃពលកម្ម អ្វីដែលប្លែកនោះគឺទាក់ទិនប្រាក់ភាគលាភ ដែលតារាឆ្នើមអាហ្សង់ទីនទទួលបានបន្ថែមមួយតង់ទៀតពីក្លឹបសេដ្ឋីបារាំង។ តាមការឲ្យដឹង Messi រកបាន ៣០ លានអឺរ៉ូ/រដូវកាល សម្រាប់រដូវកាល ២០២១/២២ និង ២០២២/២៣ ហើយប្រសិនបន្តឈរជើងនៅរដូវកាល ២០២៣/២៤ ថែមទៀត នោះប្រាក់ពលកម្មគេនឹងកើនឡើង ១០ ភាគរយ។
ទំហំនេះគឺប្រហាក់ប្រហែលនឹង Neymar ដែលមានសុពលភាពកុងត្រាដល់ឆ្នាំ ២០២៥ ដែរ តែខុសត្រង់កីឡាករប្រេស៊ីល កុងត្រារបស់គេ មានតែថយចុះភាគរយនៃថ្លៃពលកម្ម ពោលមិនមានការកើនឡើងដូចកីឡាករអាហ្សង់ទីនឡើយ។ ប្រាក់ ៣០ លានអឺរ៉ូ យើងមិនបូកបញ្ចូលនោះទេ នៅកិច្ចព្រមព្រៀងប្រាក់ឧបត្ថម្ភផ្សេងៗ ពោលនេះជាប្រាក់ពលកម្មសុទ្ធ ក្រោយកាត់ពន្ធរួចរាល់។
អ្វីដែលគួរឲ្យចាប់អារម្មណ៍ដូចបញ្ជាក់ពីខាងលើ គឺ Messi ទទួលបានប្រាក់ភាគលាភ ១ លានអឺរ៉ូ ឬជាង ១,១៧ លានដុល្លារផ្សេងទៀតក្នុងមួយឆ្នាំ ពីគម្រោងដំណើរការនៃលុយអេឡិចត្រូនិក PSG Fan Token។ បញ្ជាក់ថា នេះកើតឡើងក្រោយក្លឹបបានចុះកុងត្រាសហការជាមួយក្រុមហ៊ុន Crypto.com លើការបង្កើតផលចំណេញចន្លោះ ២៥ ទៅ ៣០ លានអឺរ៉ូ/រដូវកាលពីប្រព័ន្ធលុយអេឡិចត្រូនិកខាងលើ៕
ប្រភព៖ L’Equipe