Manchester United គួរតែបំភ្លេចអំពីការតែងតាំងអ្នកចាត់ការថ្មី មកគិតពីការរៀបចំក្រុមឱ្យបានប្រសើរឡើងវិញ នេះបើយោងតាមការលើកឡើងរបស់ខ្សែការពារ Alex Telles។
លោក Ralf Rangnick ត្រូវបានតែងតាំងជាអ្នកចាត់ការស្ដីទី រហូតដល់ចប់រដូវកាលនេះ បន្ទាប់ពីក្លិបបានបញ្ចប់តំណែងលោក Ole Gunnar Solskjaer ហើយអ្នកចាត់ការជនជាតិអាល្លឺម៉ង់ នឹងប្ដូរតំណែងជាទីប្រឹក្សារបស់ក្លិបចាប់ពីរដូវកាលក្រោយទៅ។
បច្ចុប្បន្ន Man Utd កំពុងឈរនៅលេខ៧ ក្នុងតារាង Premier League មានគម្លាត៦ពិន្ទុពីក្រុមលេខ៤ Tottenham Hotspur ដែលជាក្ដីបារម្ភថាក្រុមបិសាចក្រហម អាចបាត់ឱកាសក្នុងការទទួលបានកៅអីប្រកួតពានអឺរ៉ុបរដូវកាលក្រោយ ខណៈកំពុងមានសម្ពាធជាច្រើនដែលត្រូវប្រឈម។
ដោយឡែក អ្នកចាត់ការរបស់ Ajax លោក Erik ten Hag ត្រូវបានរាយការណ៍ថា បានយល់ព្រមក្នុងការចូលកាន់តំណែងជាអ្នកចាត់ការថ្មីរបស់ Man Utd នៅរដូវកាលក្រោយ ប៉ុន្ដែ Telles មិនចាប់អារម្មណ៍ចំពោះដំណឹងនេះទេ។
កីឡាករប្រេស៊ីលរូបនេះបាននិយាយថា៖ “ទេ, ខ្ញុំមិនគិតថាវា(ដំណឹងអំពីអ្នកចាត់ការថ្មី)មិនមានឥទ្ធិពលមកលើយើងទេ ព្រោះយើងដឹងពីអ្វីដែលយើងត្រូវធ្វើ។ មានមនុស្សមួយចំនួននៅក្លិបកំពុងធ្វើការងារពាក់ព័ន្ធនឹងអ្នកចាត់ការថ្មី ប៉ុន្ដែនោះសម្រាប់រដូវកាលក្រោយ។ ហើយនៅរដូវកាលក្រោយ អាស្រ័យលើអ្វីដែលយើងធ្វើនៅក្នុងការប្រកួតដែលនៅសល់ទាំងនេះ ដូច្នេះយើងត្រូវការការផ្ដោតអារម្មណ៍”។
“យើងមិនអាចគិតពីនរណាដែលនឹងក្លាយជាអ្នកចាត់ការបន្ទាប់នោះទេ យើងត្រូវតែគិតអំពីការខំប្រឹង នៅក្នុងការប្រកួតបន្ទាប់របស់យើង។ ប្រសិនបើខ្ញុំមិនជឿជាក់ថា យើងនៅតែអាចសង្រ្គោះរដូវកាលនេះបាន នោះខ្ញុំមិនគួរនៅទីនេះទេ។ យើងដឹងពីការងារដែលយើងមាន ដើម្បីអាចឈានដល់គោលដៅ។ យើងមិនអាចគិតពីការប្រកួតនៅខាងមុខឡើយ យើងមានការប្រកួតចុងក្រោយទល់នឹង Norwich City នៅខាងមុខយើងសិន”៕
ប្រភព៖ Live Score
អានអត្ថបទបន្ទាប់៖ កីឡាករ Man Utd ម្នាក់ ប្រកាសថានឹងចាកចេញពីក្លិបក្រោយចប់រដូវកាលនេះ ទោះនៅកុងត្រាមួយឆ្នាំទៀត
Nemanja Matic បានបញ្ជាក់ថាគេនឹងចាកចេញពី Manchester United នៅដំណាច់រដូវកាលនេះ។ ខ្សែបម្រើវ័យ៣៣ឆ្នាំ បានចំណាយពេល៥ឆ្នាំនៅ Old Trafford ប៉ុន្ដែគេពិបាកក្នុងការបង្ហាញខ្លួនក្នុងប្រកួតសម្រាប់ក្រុមបិសាចក្រហមនារដូវកាលនេះ។
អតីតកីឡាកររបស់ក្រុមតោខៀវរូបនេះ នៅសល់កុងត្រាមួយឆ្នាំទៀតក្នុងកិច្ចសន្យាបច្ចុប្បន្នរបស់គេ ប៉ុន្ដែគេបានស្នើសុំក្លិប ដើម្បីផ្ទេរចេញនៅក្នុងទីផ្សារដោះដូររដូវក្ដៅនេះ។
សូមបញ្ជាក់ថា Matic បានបង្ហាញខ្លួន១៨៣ប្រកួតសម្រាប់ Man Utd ចាប់តាំងពីចូលរួមពីក្លិប Chelsea ក្នុងរដូវក្ដៅឆ្នាំ២០១៧ ដោយរកគ្រាប់បាល់៤គ្រាប់ជូនបិសាចក្រហម។
Man Utd ត្រូវមានការងារច្រើនក្នុងការកសាងក្រុមជាថ្មីនៅតំបន់បម្រើនៅរដូវក្ដៅខាងមុខ បន្ទាប់ពីការចាកចេញរបស់ Matic។ Fred និង Scott McTominay ត្រូវបានចាត់ទុកថាជាជម្រើសដំបូងនៅក្នុងតំបន់បម្រើ ប៉ុន្ដែពួកគេលេងមិនសូវបាននឹងនរនោះទេ។
ដោយឡែកអនាគតរបស់ Paul Pogba ក៏ស្ថិតនៅក្នុងស្ថានភាពមិនច្បាស់លាស់ដែរ ស្របពេលដែលកុងត្រារបស់គេនឹងអស់សុពលភាពនៅដំណាច់រដូវកាលនេះ៕
ប្រភព៖ Goal