Man City នឹងត្រូវតតាំង Chelsea នៅយប់រំលងអាធ្រាត្រឈានចូលថ្ងៃអាទិត្យ វេលាម៉ោង ០២:០០ នាទីរំលងអាធ្រាត្រ មានផ្សាយផ្ទាល់លើទំព័រ CTS Sports។ សារនេះនឹងអាចក្លាយជាពានរង្វាន់លើកទី ១ សម្រាប់ City ហើយលើកទី ២ សម្រាប់ Chelsea ក្រោយពួកគេឈ្នះម្តងកាលពីឆ្នាំ ២០១២។
យ៉ាងណាមកមើល Kevin de Bruyne ដែលធ្លាប់ជាអតីតកីឡាករមិនជោគជ័យនៅតោខៀវមួយរូប និងបច្ចុប្បន្នកំពុងបម្រើអាជីពឲ្យក្លឹប Man City បាននិយាយថា ជ័យជម្នះនៅ UCL កាលពីឆ្នាំ ២០១២ ហាក់មិនស្ថិតក្នុងការចងចាំរបស់ខ្លួនទាល់តែសោះ ពោលសឹងតែខ្លួនមិនចាំថា Chelsea ធ្លាប់ឈ្នះពាន UCL ផង។
បញ្ជាក់ Chelsea ធ្លាប់បានចុះហត្ថលេខាយក Kevin de Bruyne ពីក្លឹប Genk លើកុងត្រារយៈពេល ៥ ឆ្នាំកន្លះនៅ ឆ្នាំ ២០១២ ជាមួយតម្លៃផ្ទេរ ៦,៧ លានផោន ពោលគឺមុនរយៈពេល ៤ ខែនៃវគ្គផ្ដាច់ព្រ័ត្រ UCL តែក្លឹបពុំបានអញ្ជើញគេឲ្យមកចូលរួមឡើយ។
ប្រាប់សារព័ត៌មាន The Sun តារាឆ្នើមរបស់ក្លឹប Man City និយាយ៖ “ខ្ញុំមិនបាននៅទីនោះទេ ហើយខ្ញុំក៏មិនបានគេអញ្ជើញឲ្យទៅចូលរួមទស្សនាការប្រកួតនោះដែរ និយាយស្មោះត្រង់ទៅខ្ញុំមិនសូវចាំពីព្រឹត្តិការណ៍សារនោះឡើយ”។
លោកបន្ថែមថា៖ “ជាមួយវគ្គផ្ដាច់ព្រ័ត្រ Chmapions League នេះ ប្រកួតខ្លះខ្ញុំមើល ប្រកួតខ្លះក៏ខ្ញុំមិនបានមើលដែរ វាស៊ីសងលើស្ថានភាពប្រកួតនោះ ហេតុហ្នឹងហើយទើបក្រុមឈ្នះនៅឆ្នាំ ២០១២ មិនសូវធ្វើឲ្យខ្ញុំចងចាំបាន”៕
ប្រភព៖ AF
អានអត្ថបទបន្ទាប់៖ ក្លិបជើងឯកលីគអឺរ៉ុបមួយទៀតហើយ ប្រកាសចែកផ្លូវគ្នាជាមួយគ្រូបង្វឹក
លោក Antonio Conte បានចាកចេញពីតំណែងអ្នកចាត់ការក្លិប Inter Milan ក្រោយជួយពួកគេគ្រងតំណែងជើងឯក Serie A កាលពី៣សប្ដាហ៍មុន ដែលនេះជាពានលីគកំពូលអ៊ីតាលីដែលពួកគេឈ្នះលើកដំបូងក្នុងរយៈពេល១១ឆ្នាំចុងក្រោយ។
បុរសវ័យ៥១ឆ្នាំជនជាតិអ៊ីតាលី បានចាយពេល២រដូវកាលដឹកនាំ Inter ខណៈកិច្ចសន្យារបស់លោកជាមួយក្លិបនេះនឹងអស់សុពលភាពនៅរដូវក្ដៅឆ្នាំក្រោយ ដែលលោកជាអ្នកចាត់ការទី២បន្ទាប់ពីលោក Christophe Galtier របស់ Lille ដែលចាកចេញពីតំណែងក្រោយជួយក្រុមឈ្នះជើងឯក។
នៅក្នុងសេចក្ដីថ្លែងការណ៍ Inter បានថ្លែងអំណរគុណដល់លោក Conte ចំពោះការងារដ៏អស្ចារ្យដែលលោកបានធ្វើសម្រាប់ក្លិប ហើយអ្នកចាត់ការរូបនេះ បច្ចុប្បន្នមានការផ្សារភ្ជាប់ទៅដឹកនាំ Real Madrid និង Tottenham Hotspur។
ក្រុមហ៊ុនចិន Suning ដែលជាម្ចាស់ក្លិប Inter ត្រូវបានរាយការណ៍ថា កំពុងប្រឈមនឹងបញ្ហាហិរញ្ញវត្ថុ ដែលធ្វើឱ្យក្លិបជើងឯកលីគកំពូលអ៊ីតាលីថ្មីថ្មោង ត្រៀមលក់កីឡាករឆ្នើមច្រើនរូបនៅរដូវក្ដៅនេះ។
រំឭកកាលពីខែកុម្ភៈកន្លងមក ក្លិប Jiansu Suning ដែលជាកម្មសិទ្ធរបស់ក្រុមហ៊ុនខាងលើ ត្រូវបានបិទចោលក្រោយឈ្នះជើងឯកលីគកំពូលចិនបាន៣ខែប៉ុណ្ណោះ៕
ប្រភព៖ BBC