ព្រឹត្តិការណ៍កីឡាអូឡាំពិក វិញ្ញាសាបាល់ទាត់បុរស នឹងប្រកួតវគ្គផ្តាច់ព្រ័ត្រ កំណត់ក្រុមឈ្នះមេដាយមាស និងប្រាក់នៅថ្ងៃទី ៧ សីហា ខណៈដែលការដណ្តើមយកមេដាយសម្រិតនៅមុននោះមួយថ្ងៃ។
អេស្ប៉ាញត្រូវប៉ះប្រេស៊ីល ដែលជាក្រុមឈ្នះជើងឯកកាលពីព្រឹត្តិការណ៍សារមុន ហើយសម្រាប់ប្រេស៊ីល ប្រសិនពួកគេទទួលជ័យជម្នះទៀតនោះ ក៏នឹងក្លាយជាក្រុមទី ៥ ហើយនៅប្រវត្តិសាស្រ្តបាល់ទាត់អូឡាំពិក ដែលអាចឈ្នះមេដាយមាស (ជើងឯក) ២ លើកជាប់ៗគ្នា។
កន្លងមកមាន ៤ ក្រុមដែលធ្លាប់ធ្វើបាន តួយ៉ាងដូចជា៖ ចក្រភពអង់គ្លេស ឆ្នាំ ១៩០៨ និង ១៩១២, អ៊ុយរុយហ្គាយ ១៩២៤ និង ១៩២៨, ហុងគ្រី ១៩៦៤ និង ១៩៦៨ ហើយអាហ្សង់ទីន ២០០៤ និង ២០០៨។ ចុះសម្រាប់ប្រេស៊ីលអាចនឹងក្លាយជាក្រុមទី ៥ ដែលឈ្នះនៅឆ្នាំ ២០១៦ ហើយ ២០២០ (ឬ ២០២១) បានដែរឬទេ?
គួរបញ្ជាក់ថា អូឡាំពិកគឺធ្វើឡើងរៀងរាល់ ៤ ឆ្នាំម្តងដូចជា FIFA World Cup អ៊ីចឹងដែរ តែការប្រកួតមុនគ្នា ២ ឆ្នាំ ជាក់ស្តែងដូចអូឡាំពិកសារនេះត្រូវធ្វើនៅឆ្នាំ ២០២០ គឺ World Cup នៅឆ្នាំ ២០២២។ វិញ្ញាសាបាល់ទាត់បុរស ក្រុមដែលឈ្នះមេដាយមាសច្រើនជាងគេ គឺជម្រើសជាតិហុងគ្រី និងអង់គ្លេសធ្វើបាន ៣ លើក៕
ប្រភព៖ AF
អានអត្ថបទបន្ទាប់៖ ឃើញក្លិបនៅអង់គ្លេស &អ៊ីតាលីចាប់ចិត្តខ្លាំង ពេលនេះ Madrid បញ្ចេញតម្លៃខ្លួនមួយ សម្រាប់ Ceballos ហើយ
ក្លិប Real Madrid ត្រូវបានគេរាយការណ៍ថាបានដាក់ចេញតម្លៃខ្លួនមួយ សម្រាប់កីឡាករ Dani Ceballos នៅក្នុងទីផ្សារដោះដូរកីឡាកររដូវក្តៅនេះ ចំពេល Arsenal ចាប់អារម្មណ៍ចង់ចុះហត្ថេលខាលើគេ ក្នុងលក្ខខណ្ឌជាអចិន្ត្រៃយ៍ ។
ជាក់ស្តែង ខ្សែបម្រើអេស្បា៉ញរូបនេះ បានចំណាយពេលពីររដូវកាលចុងក្រោយ ក្នុងលក្ខខណ្ឌខ្ចីជើងជាមួយក្រុម Arsenal ដោយបានបង្ហាញខ្លួនសរុបចំនួន ៧៧ លើកជាមួយក្រុមនៅក្របខ័ណ្ឌ Premier League មួយនេះ។
តែទោះជាយ៉ាងណាក៏ដោយ Caballos មិនត្រូវបានគេជឿជាក់ថានឹងស្ថិតនៅក្នុងផែនការរបស់គ្រូបង្វឹកថ្មីលោក Carlo Ancelotti សម្រាប់រដូវកាល ២០២១-២២ នេះនោះទេ ដ្បិត AC Milan កំពុងស្ថិតក្នុងចំណោមក្លឹបមួយចំនួនទៀត ដែលបង្ហាញចេតនាចង់បានកីឡាកររូបនេះផងដែរ ។
យ៉ាងណាក៏ដោយ យោងតាមសារព័ត៌មាន ABC ថ្មីៗនេះបានបង្ហាញថា Real Madrid មានបំណងលក់ខ្សែបម្រើរូបនេះចេញ នៅលើទីផ្សារបច្ចុប្បន្ន ជាមួយនឹងការកំណត់តម្លៃខ្លួនប្រមាណ ៤០ លានអឺរ៉ូ (ស្មើនឹង ៣៤ លានផោន) ។
រំលឹកផងដែរ Ceballos បានចូលរួមជាមួយ Los Blancos ពីក្លិប Real Betis ក្នុងឆ្នាំ ២០១៧ ហើយបានក្លាយជាកីឡាករចូលលេងពេញលេញត្រឹមតែ ២ រដូវកាលដំបូងប៉ុណ្ណោះ ។ កិច្ចសន្យាបច្ចុប្បន្នរបស់ខ្សែបម្រើរូបនេះ នឹងត្រូវផុតកំណត់នៅខែមិថុនាឆ្នាំ ២០២៣ ៕
ប្រភព: Sportsmole