ក្រុម Real Madrid ត្រូវបានគេរាយការណ៍ថាធ្លាប់បានពិចារណានាំយកខ្សែការពារ David Luiz មកកាន់ទឹកដីអេស្ប៉ាញ នៅអំឡុងទីផ្សារដោះដូររដូវក្តៅកន្លងទៅនេះ ។
ជាក់ស្តែង Luiz បានក្លាយជាកីឡាករដែលគ្មានតម្លៃខ្លួន បន្ទាប់ពិកុងត្រាថរបស់គេជាមួយ Arsenal ដល់ពេលត្រូវអស់សុពលភាព ហើយគ្រូបង្វឹកលោក Carlo Ancelotti ត្រូវបានគេនិយាយថាជាអ្នកគាំទ្រដ៏ធំមួយរបស់កីឡាករសញ្ជាតិប្រេស៊ីលរូបនេះ ។
រំលឹកថា នៅពេលកីឡាករ Raphael Varane និង Sergio Ramos សម្រេចចិត្តចាកចេញពី គ្រូបង្វឹកសញ្ជាតិអេស្ប៉ាញរូបនេះ ត្រូវគេរាយការណ៍ថាបានទាក់ទងតាមទូរសព្ទទៅកាន់ Luiz ដោយផ្ទាល់ ដើម្បីសួរពីចំណាប់អារម្មណ៍របស់គេ ក្នុងការផ្ទេរមកកាន់ទឹកដី Bernabeu ឬអត់ ។
យ៉ាងណានេះបើតាមការលើកឡើងរបស់សារព័ត៌មាន Diario AS ដែលអះអាងទៀតថា Luiz ក៏ទទួលបានការផ្តល់ជូនពីសំណាក់ក្លិបធំៗផ្សេងទៀតដូចជា Everton, West Ham, Benfica, Lazio, Marseille និង Lille ផងដែរ ។
ប៉ុន្តែទោះជាយ៉ាងណាក៏ដោយ នៅទីបំផុត Luiz បានសម្រេចចិត្តយ៉ាងច្បាស់ថារូបគេនឹងវិលត្រលប់ទៅលេងនៅក្លិបប្រទេសកំណើតវិញ ដោយចូលរួមជាមួយ Flamengo ដែលជាហេតុធ្វើឲ្យគ្រូបង្វឹកលោក Ancelotti បានត្រឹមកាត់ចិត្ត និងចាប់ផ្តើមរដូវកាលថ្មី ជាមួយជម្រើសកីឡាករដូចជា David Alaba, Eder Militao, Nacho Fernandez និង Jesus Vallejo ជំនួសវិញ ៕
ប្រភព: FootballEspana
អានអត្ថបទបន្ទាប់៖ Merson ថា Liverpool នឹងស៊ី Crystal ដាច់គ្រាប់ តែ Man Utd បានត្រឹម ៣ ពិន្ទុស្រាលៗនៅសប្តាហ៍នេះ
ការប្រកួតក្របខ័ណ្ឌ Premier League ជុំទី ៥ បានវិលត្រលប់មកដល់ទៀតហើយនៅចុងសប្តាហ៍នេះ ដោយយើងក៏នឹងមានគូពិសេសជាច្រើន ដែលមានផ្សាយផ្ទាល់លើទំព័រ CTS Sports។ មុនឈានដល់ការប្រកួតលោក Paul Merson អ្នកវិភាគលើប៉ុស្តិ៍ទូរទស្សន៍មួយ និងជាអតីតកីឡាករនៅ Arsenal បានបង្ហាញការទស្សន៍ទាយលទ្ធផលគូសំខាន់ទាំង ៤ ដូចខាងក្រោម៖
សម្រាប់គូ Arsenal ទល់ Burnley លោកជឿជាក់ថា Arsenal នឹងអាចយកឈ្នះ ២-១ ពោលនឹងយកបាន ៣ ពិន្ទុងើបចេញពីចំណាត់ថ្នាក់កៀកបាតតារាង។ គិតត្រឹមជុំទី ៤ ក្រុមដឹកនាំដោយលោក Mikel Arteta ទើបឈ្នះ ១ ចាញ់ ៣ មាន ៣ ពិន្ទុប៉ុណ្ណោះ។
ទៅមើលគូ Liverpool ដែលត្រូវបើកកីឡដ្ឋាន Anfield ស្វាគមន៍ក្លឹប Crystal Palace លោក Merson ជឿថា ហង្សនឹងស៊ីដាច់គ្រាប់ ពោលគឺ ៣-០ ដូច្នេះមានន័យថា ក្រុមដឹកនាំដោយលោក Jurgen Klopp នឹងអាចបន្តឈរកំពូលតារាង ខណៈគិតត្រឹមជុំទី ៤ មាន ១០ ពិន្ទុ។
រីឯ West Ham ទល់ Man Utd លោកយល់ឃើញថា ដោយមើលឃើញទម្រង់លេងពាក់កណ្តាលសប្តាហ៍របស់បិសាចធ្វើមិនសូវបានល្អ ដូច្នេះនឹងអាចយកឈ្នះញញួរបាន តែមិនច្រើនគ្រាប់ទេ ពោលត្រឹម ១-០ ទទួលបាន ៣ ពិន្ទុដូចហង្សអ៊ីចឹងដែរ។
គូពិសេសចុងក្រោយគឺ Tottenham និង Chelsea លោកយល់ឃើញថា តោខៀវនឹងនៅតែមានប្រៀបជាង តែក៏មិនកើតឡើងលើសពី ៤ គ្រាប់នោះដែរ។ លទ្ធផលទស្សន៍ទាយលោកថា Tottenham Hotspur ១-២ Chelsea សម្រាប់ការប្រកួតក្នុងដីរបស់មាន់ខ្នាយមាសសារនេះ៕
ប្រភព៖ Metro