អតីតខ្សែប្រយុទ្ធអង់គ្លេស Peter Crouch បានអះអាងថា Mohamed Salah មិនមានការចាប់អារម្មណ៍ក្នុងការផ្ទេរមកចូលរួម Real Madrid ឡើយ។ ក្លិបអធិរាជស មានការផ្សារភ្ជាប់ទៅនឹងការផ្ទេរ ខ្សែប្រយុទ្ធជនជាតិអាហ្ស៊ីបរូបនេះ ចាប់តាំងពីគេបង្ហាញភាពលេចធ្លោក្នុងរដូវកាលដំបូងឱ្យ Liverpool មកម្ល៉េះ។
ទោះបីជាមានចចាមអារ៉ាម មិនចេះដាច់ ប៉ុន្ដែមិនមានសំណើជាផ្លូវការណាមួយ ត្រូវបានដាក់នៅលើតុ Liverpool ឡើយ ខណៈ Salah នៅតែជាកីឡាករដ៏សំខាន់ម្នាក់ នៅក្នុងក្រុមរបស់លោក Jurgen Klopp។
អតីតយុវជនរបស់ Chelsea រូបនេះ រកគ្រាប់បាល់ទី១០០របស់ខ្លួនសម្រាប់ Liverpool កាលពីចុងសប្ដាហ៍មុន ហើយបើគិតសរុបនៅក្នុងអាជីពរបស់ខ្លួនសម្រាប់ក្រុមអង់គ្លេសមួយនេះ គេរកគ្រាប់បាល់បាន១៣១គ្រាប់ ក្នុងការបង្ហាញខ្លួនលើទីលាន ២១០ប្រកួត។
លោក Crouch បានអះអាងនៅក្នុងសារព័ត៌មាន Daily Mail ថា Salah ហាក់មិនទទួលបានការស្រលាញ់គោរព នៅក្នុងកម្រិតមួយដូច Luis Suarez និង Fernando Torres ឡើយ ហើយបុរសវ័យ៤០ឆ្នាំ ក៏បានទទូចឱ្យក្លិបហង្សក្រហម បន្ដកិច្ចសន្យាថ្មីសម្រាប់ Salah ដើម្បីបញ្ចប់ចចាមអារ៉ាម ពាក់ព័ន្ធនឹងក្លិប Real Madrid។
អតីតខ្សែប្រយុទ្ធ Liverpool បានសរសេរថា៖ “Real Madrid កំពុងតាមចែចង់គេ ប៉ុន្ដែហេតុអ្វីបានជាគេត្រូវទៅទីនោះ? មិនមានក្លិបណាមួយនៅលើលោកនេះ ដែលគេចូលរួម ល្អជាង Liverpool ឡើយនាពេលនេះ”។
“ប្រហែលជា បើគេទៅចូលរួមកន្លែងផ្សេងនៅ Premier League គេនឹងបាត់បង់នូវអ្វីដែលគេខំសាងនៅ Anfield។ មិនមានក្លិបគោលដៅណាមួយនៅអឺរ៉ុប ដែលងាយស្រួលសម្រាប់គេឡើយ។ Barcelona និង Real គឺមិនដូចពីមុនទេ ហើយមានកត្តាផ្សេងទៀតជាមួយ Paris Saint-Germain និង គុណសម្បត្តិនៃ Ligue 1″៕
ប្រភព៖ Football Espana
អានអត្ថបទបន្ទាប់៖ អវត្តមានកីឡាករសំខាន់ម្នាក់ ក្នុងចំណោមកីឡាករ ២២ រូបរបស់ Liverpool ត្រៀមប៉ះ Porto
ក្លឹប FC Porto នឹងត្រូវបើកកីឡដ្ឋានស្វាគមន៍ក្លឹបហង្សក្រហម Liverpool នៅវេលាម៉ោង ០២:០០ នាទីទាបភ្លឺ ឈានចូលថ្ងៃទី ២៩ កញ្ញា ជាជំនួបជុំទី ២ វគ្គចែកពូល UEFA Champions League មានផ្សាយផ្ទាល់លើទំព័រ CTS Sports។
យ៉ាងណាមុននេះ យើងក៏បានដឹងពីអវត្តមានរបស់កីឡាករសំខាន់មួយរូបនោះគឺខ្សែការពារស្លាបស្តាំ Trent-Aelxander Arnold ដែលមិនបានធ្វើដំណើរមកទីក្រុង Porto ប្រទេសព័រទុយហ្គាល់ ជាមួយចំណោមកីឡាករទាំង ២២ រូបរបស់លោក Jurgen Klopp នោះទេ។
គេបានទទួលការហ្វឹកហាត់មុននេះដែរ តែលោក Klopp មើលឃើញថាមិនទាន់ស្រួល ពោលគឺមិនទាន់ត្រៀមខ្លួនរួចរាល់សម្រាប់ការប្រកួតនាពាក់កណ្តាលសប្តាហ៍ តែបើចុងសប្តាហ៍ប៉ះ Man City នៅលីគ Premier League ប្រហែលជាអាចមានវត្តមានគេ។
ជាមួយការលេងទល់ Porto រាត្រីនេះដែរ បន្ទាប់ពីអវត្តមាន Arnold ដូច្នោះហើយលោក Klopp ទំនងជានឹងដាក់ James Milner ឲ្យចូលលេងជំនួស ឬក៏អាចជា Joe Gomez ខណៈនៅតំបន់ការពារកណ្តាលមាន Joel Matip និង Virgil van Dijk៕
ប្រភព៖ Liverpoolecho