ក្លឹបយក្ស Real Madrid ត្រូវបានគេរាយការណ៍ថា ចង់បំពេញទាំងចន្លោះនៅតំបន់ការពារ និងតំបន់ប្រយុទ្ធរួមគ្នានាពេលតែមួយ នៅទីផ្សារដោះដូររដូវក្តៅខាងមុខ ឆ្នាំ ២០២២។ ដំបូងឡើយគឺ Kylian Mbappe ជាគោលដៅអាទិភាព តែចន្លោះនៅតំណែងការពារកណ្តាលក៏ជាបញ្ហាដែលមិនអាចមើលរំលងនោះដែរ។
បើតាមរបាយការណ៍ពីសារព័ត៌មាន ABC ចុះផ្សាយថា ក្លឹបស្តេចស Madrid បាននឹងកំពុងមើលឃើញខ្សែការពារ Antonio Rudiger របស់ក្លឹបតោខៀវ Chelsea ដោយរង់ចាំអុតមើលការចរចាកុងត្រាថ្មីរបស់គេ ប្រសិនជាបរាជ័យ នោះក្លឹបនឹងចូលចរចាភ្លែត ហើយយកគេនៅលក្ខខណ្ឌឥតតម្លៃផ្ទេរ មកកាន់ទឹកដី Bernabeu។
ជាការពិតដូចបង្ហើបពីខាងលើ ខ្សែការពារសញ្ជាតិអាល្លឺម៉ង់ គេត្រូវផុតកុងត្រានៅរដូវក្តៅ ឬចុងបញ្ចប់រដូវកាលនេះ ហើយតាមដឹងខាង Chelsea ក៏ព្រមដំឡើងថ្លៃពលកម្ម ចង់ថ្ពក់ជើងគេឲ្យបន្តនៅយូរតទៅទៀតដែរ តែសំខាន់សាមីខ្លួនហាក់មានចិត្តចង់បែ.កច្រើនជាង។
បើយកបាន Rudiger វានឹងក្លាយជារឿងល្អ សម្រាប់ក្រុមដឹកនាំដោយលោក Carlo Ancelotti ព្រោះតំបន់ការពារនឹងកាន់តែរឹងមាំបន្ថែមទៀត តាមរយៈការសហការរវាងគេនិង David Alaba ស្នងបន្តពីដៃគូចាស់ Varane&Ramos ដែលបានផ្ទេរចេញកាលពីរដូវក្តៅ៕
ប្រភព៖ ABC
អានអត្ថបទបន្ទាប់៖ Luis Enrique មិនអាចជួយក្រុមជម្រើសជាតិអេស្ប៉ាញ ឈ្នះពានលើកដំបូងក្នុងការដឹកនាំរបស់ខ្លួន
គ្រូបង្គោល Luis Enrique មិនអាចជួយក្រុមជម្រើសជាតិអេស្ប៉ាញឈ្នះពានរង្វាន់លើកដំបូង ក្នុងការដឹកនាំរបស់លោក បន្ទាប់ពីបរាជ័យក្រោមថ្វីជើងបារាំងដោយលទ្ធផល ១-២ ក្នុងការប្រកួតផ្ដាច់ព្រ័ត្រ UEFA Nations League។
ក្រុមគោជល់អេស្ប៉ាញ មានឱកាសរកគ្រាប់បាល់នាំមុខមុនដោយខ្សែប្រយុទ្ធ Mikel Oyarzabal ប៉ុន្ដែត្រូវបាន Karim Benzema រកបានមួយគ្រាប់តាមស្មើវិញ ហើយ Kylian Mbappe ជាអ្នកស៊ុតគ្រាប់បាល់ជ័យជម្នះជូនក្រុមបារាំង ក្លាយជាជើងឯក Nations League។
នេះជាការប្រកួតផ្ដាច់ព្រ័ត្រលើកដំបូងរបស់លោក Enrique ក្នុងនាមជាគ្រូបង្គោលក្រុមជម្រើសជាតិអេស្ប៉ាញ បន្ទាប់ពីដឹកនាំក្រុមគោជល់ឡើងដល់ត្រឹមវគ្គពាក់កណ្ដាលផ្ដាច់ព្រ័ត្រ EURO 2020។
សូមបញ្ជាក់ថា ការចូលរួមប្រកួតជុំចុងក្រោយនៃពានរង្វាន់ Nations League បានធ្វើឱ្យកាលបរិច្ឆេទប្រកួតជម្រុះ World Cup 2022 របស់ក្រុមជម្រើសជាតិដែលបានចូលរួម ត្រូវលើកទៅធ្វើនៅខែក្រោយវិញ៕