បច្ចុប្បន្ន ក្រុមបិសាចក្រហម Manchester United នៅមិនទាន់មានគ្រូបង្វឹកផ្លូវការនៅឡើយ ខណៈលោក Ralf Rangnick គឺគ្រាន់តែជាអ្នកចាត់ការបណ្ដោះអាសន្នសម្រាប់ក្រុមតែប៉ុណ្ណោះ ស្របពេលពួកគេបានប្រកាសថា នឹងរកបេក្ខភាពសក្ដិសមបំផុតសម្រាប់តំណែងមួយនេះនៅរដូវក្ដៅខាងមុខ។
ទន្ទឹមនឹងនោះ អតីតកីឡាករ Teddy Sheringham ដែលធ្លាប់មានតួនាទីជាខ្សែប្រយុទ្ធនៅទឹកដី Old Trafford បានបង្ហាញពីចំណាប់អារម្មណ៍របស់លោក ទាក់ទងនឹងដំណោះស្រាយសម្រាប់អតីតក្រុមរបស់លោក ដោយបានយល់ឃើញថា បេក្ខភាពដែលសក្ដិសមដឹកនាំ Man Utd បំផុតនាពេលនេះគឺ Mauricio Pochettino។
ប្រាប់ទៅកាន់សារព័ត៌មានក្រៅស្រុកមួយ អតីតខ្សែប្រយុទ្ធខាងលើនិយាយ៖ ” Manchester United តែងតែបង្ហាញនូវភាពជាអ្នកគ្រប់គ្រងស្ថានការណ៍ នៅពេលប្រកួតម្ដងៗ ហើយខ្ញុំជឿថា បើសិនជាយើងមើលឲ្យដិតដល់ទៅ វាគឺពិតជាស៊ីគ្នាជាមួយនឹងការដឹកនាំរបស់ Pochettino មែនទែន”។
បញ្ជាក់ដែរថា បច្ចុប្បន្ន Pochettino កំពុងដឹកនាំក្រុមសេដ្ឋី Paris Saint-Germain តែកៅអីជាគ្រូបង្វឹករបស់លោកហាក់មានភាពរង្គោះរង្គើ ក្រោយលឺចចាមអារ៉ាមឥតឈប់ឈរ ពីការចូលខ្លួនប្រជែងរបស់ Zinedine Zidane ស្របពេលក្ដីសង្ឃឹមរបស់អ្នកគាំទ្របិសាចក្រហម ដែលចង់ឃើញវត្តមានរបស់លោកមកដឹកនាំក្រុម កាន់តែពុះកញ្ជ្រោលដូចគ្នា៕
ប្រភព: Sportskeeda
អានអត្ថបទបន្ទាប់៖ Fabrizio Romano៖ “បើ Man utd នៅចង់បាន Haaland អាចពិបាក តែបើសាកចាប់អារម្មណ៍ម្នាក់នេះ សង្ឃឹមជាង”
អ្នកណាក៏ដឹងថា កីឡាករ Erling Haaland គឺជាខ្សែប្រយុទ្ធកំពុងឡើងកូដខ្លាំង ហើយក៏កំពុងស្ថិតនៅក្រោមការឃ្លាំមើលពីសំណាក់ក្រុមធំៗជាច្រើនទូទាំងតំបន់អឺរ៉ុបដូចគ្នា ខណៈក្នុងនោះក៏លឺល្ហៀងៗមានក្រុមបិសាចក្រហម Manchester United ផងដែរ។
យ៉ាងណា ក្ដីសង្ឃឹមចង់បានកីឡាករន័រវែសរបស់ម្ចាស់ដី Old Trafford ហាក់ដូចជាមានមិនសូវច្រើន ស្របពេលអ្នកសារព័ត៌មានល្បីឈ្មោះ Fabrizio Romano បង្ហើបឲ្យដឹងដែរថា បើសិនជាបិសាចក្រហមសន្សំចិត្តចង់បានយុវជនវ័យ ២១ ឆ្នាំខាងលើអាចនឹងពិបាក ដូច្នេះគួរងាករកកង់សាគួរផ្សេងទើបជាមធ្យោបាយប្រសើរ។
ប្រាប់នៅក្នុងឆាណែល YouTube របស់លោក Rio Ferdinand បុរសខាងលើនិយាយ៖ “ពិតមែនហើយ ពួកគេ (Man utd) មានជម្រើសច្រើន ហើយនឹងសម្រេចជាផ្លូវការជាមួយនឹងវត្តមានគ្រូបង្វឹកថ្មី ដោយសារវាជាការសម្រេចចិត្តដ៏សំខាន់ ហើយតម្រូវឲ្យស៊ីគ្នាជាមួយនឹងទម្រង់លេងរបស់អ្នកចាត់ការថ្មីផង”។
“ជាក់ស្ដែង មានចចាមអារ៉ាមថា ពួកគេចង់បាន Haaland តែនេះគឺជារឿងដែលស្ទើរតែមិនអាចទៅរួច ដោយសារខ្ញុំមិនយល់ឃើញថា Haaland គឺជាជម្រើសសមស្របជាមួយស្ថានការណ៍របស់ Man Utd ឡើយ។ បើជាខ្ញុំ ខ្ញុំនឹងងាកទៅតាមដានកីឡាករផ្សេងៗដូចជា Lautaro Martinez វិញ ព្រោះគេអាចនឹងស្ថិតនៅជម្រើសដំបូងរបស់ Man utd ហើយក្ដីសង្ឃឹមក៏ហាក់មានច្រើនជាង Haaland”៕
ប្រភព: Sportskeeda