ក្លឹប Barcelona នៅពេលចុងក្រោយ ជាពិសេសក្រោមការដឹកនាំរបស់លោក Xavi Hernandez ហាក់មានកីឡាករជាច្រើន ប្រាថ្នាចង់មករួបរួម ដ្បិតបើដឹងថាស្ថានភាពក្លឹបលើការចាយវាយប្រាក់ឈ្នួលកីឡាករ មិនសូវជាល្អក៏ដោយ។
ជាក់ស្តែងដូចករណី Angel di Maria គេបានប្រកាសហើយថានឹងចាកចេញពី Paris Saint-Germain នៅបញ្ចប់រដូវកាល ២០២១/២២ ពោលនឹងផ្លាស់ទៅក្លឹបថ្មី នៅលក្ខខណ្ឌផ្ទេរឥតតម្លៃខ្លួន។ បើតាមសារព័ត៌មាន Mundo Deportivo ចុះផ្សាយថា អតីតកីឡាករធ្លាប់គ្រោងឈុតស្តេចសរូបនេះ គេមិនទាន់ព្រមការផ្ទេរទៅក្លឹបណាមួយនៅឡើយ ពោលនៅរង់ចាំសំណើ Barcelona មកដល់ ព្រោះអីហាក់ពេញចិត្តចង់ទៅចូលរួមនៅអ្នកមានបុណ្យ។
បុរសវ័យ ៣៤ ឆ្នាំ កន្លងមកធ្វើបានល្អ ទាំងនៅ PSG និងជម្រើសជាតិអាហ្សង់ទីន ហើយសមត្ថភាពរបស់គេ តាមថាគឺអាចទៅបំពេញតំណែងស្លាបស្តាំ ជំនួស Ousmane Dembele បានងាយ ប្រសិនកីឡាករបារាំង ច្បាស់ថាមិនបន្តនៅ។ យ៉ាងណា អ្នកមានបុណ្យឯណោះ ក៏ល្ហិចល្ហៀងថាបានចាប់ចិត្តលើកីឡាករដទៃ Raphinha មួយរូបទៀត គ្រាន់ថាបើយកពី Leeds គឺត្រូវតែចាយលុយធំ តែបើយក Di Maria គឺ Free។
យើងនឹងរង់ចាំមើលថាតើ Barcelona នឹងសម្រេចចិត្តបែបណា ហើយសាមីខ្លួន Di Maria ផ្ទាល់ បើព្រមមកចុះចូលនៅក្លឹបម្ចាស់ដី Camp Nou គេនឹងព្រមតាមសំណើនៃការកាត់បន្ថយថ្លៃពលកម្មបានឬអត់។ រំឭកឲ្យដឹង កីឡាករអាហ្សង់ទីនធ្លាប់បានចាយពេល ៤ ឆ្នាំឲ្យ Real Madrid ហើយរកបាន ២២ គ្រាប់ នៅការបង្ហាញខ្លួន ១២៤ ប្រកួត បើយើងរាប់តែស្ថិតិនៅ La Liga៕
ប្រភព៖ Mundo Deportivo