ក្លឹបអ្នកមានបុណ្យ Barcelona ត្រូវបានគេរាយការណ៍ថា កំពុងចាប់អារម្មណ៍ចង់នាំយកខ្សែប្រយុទ្ធឥតតម្លៃខ្លួន ២ រូប នៅទំនេរជើងស្រាប់លើទីផ្សារដោះដូរ ពោលបើចរចាសម្រេច គឺប្រុងយកទាំង ២ តែម្តង។ រាប់បានជាគោលដៅដ៏សក្ដិសម ព្រោះសុទ្ធជាកីឡាករមានគុណភាពស្រាប់ ហើយអត់ទាមទារឲ្យចំណាយសូម្បីមួយសេន្ត។
តាមសារព័ត៌មាន Fichajes ចុះផ្សាយថា ដ្បិតបើអ្នកមានបុណ្យ បានដាក់គោលដៅចង់នាំចូល Robert Lewandowski តែក៏មានរ៉ាដាបម្រុង ២ រូបផ្សេងទៀតដែរ រួមមាន Angel di Maria និង Edinson Cavani ជាកីឡាករទើបផុតកុងត្រានៅក្លឹប Paris Saint-Germain និង Manchester United។ ល្ហិចល្ហៀងតាមចចាមអារ៉ាមចុះផ្សាយ ពួកគេផ្ទាល់ក៏បានគិតគូរចង់ជ្រើសយក Barcelona ជាទ្រនំបន្ទាប់ផងដែរ។
បញ្ជាក់ថា Cavani កាលពីរដូវកាល មិនទាន់មាន Ronaldo មក Old Trafford គេធ្វើបានល្អណាស់ ដល់តែរដូវកាលចុងក្រោយ មិនសូវបានលេង សឹងតែបាត់មុខពីទីលាន។ សរុបស្ថិតិ ៥៩ ប្រកួត ក៏រកបាន ១៩ គ្រាប់និង Assist ៧ លើក មុនការដើរចេញពីក្លឹបនៅឯទឹកដីអង់គ្លេស។
ងាកទៅ Di Maria គេអាចមកបំពេញកន្លែង Ousmane Dembele ដ៏សក្តិសមបំផុត ប្រសិនជាកីឡាករបារាំងត្រូវចាកចេញពិតមែន។ ស្ថិតិរដូវកាលចាស់ឲ្យក្លឹបមានមូលដ្ឋានក្នុងទីក្រុងប៉ារីស ខ្សែប្រយុទ្ធអាហ្សង់ទីន ក៏រកបាន ៥ គ្រាប់និង Assist ៩ លើក នៅការបង្ហាញខ្លួន ៣១ ប្រកួត៕
ប្រភព៖ Fichajes