ថ្មីៗនេះ ខ្សែប្រយុទ្ធ Cristiano Ronaldo បានបញ្ចុះបញ្ចូលឱ្យក្លិបធំនៅ La Liga ចុះហត្ថលេខានាំយកខ្លួន ចេញពីក្លិបបិសាចក្រហម Manchester United នៅទីផ្សារដូវក្តៅនេះ ។ នេះបើយោងតាមការចុះផ្សាយពីកាសែតអេស្ប៉ាញ Diario AS ។
ជាការពិតណាស់ Ronaldo កំពុងស្វែងរកលទ្ធភាពក្នុងការផ្លាស់ប្តូរក្លិប នៅទីផ្សាររដូវក្តៅនេះ បន្ទាប់ពីបានជូនដំណឹងទៅកាន់ Man Utd អំពីការសម្រេចចិត្តរបស់គេ ក្នុងការចាកចេញពីទឹកដី Old Trafford ដើម្បីស្វែងរកឱកាសលេងនៅពានរង្វាន់ Champions League ។
ហើយឥឡូវនេះ វាត្រូវបានគេយល់ថា Ronaldo អាចវិលត្រឡប់ទៅ La Liga វិញ នៅពេលដែល ខ្សែប្រយុទ្ធសញ្ជាតិព័រទុយហ្គាល់ បានបញ្ចុះបញ្ចូលអ្នកចាត់ការក្រុម Atletico Madrid លោក Diego Simeone ឱ្យចុះហត្ថលេខាលើរូបគេ។
យ៉ាងណានេះអាចជាដំណឹងគួឱ្យភ្ញាក់ផ្អើលមួយ នៅពេលដែល Ronaldo ធ្លាប់មានទំនាក់ទំនងយ៉ាងខ្លាំង ជាមួយក្លិប Real Madrid ដោយបានចូលរួមជាមួយពួកគេពីក្រុម Manchester United ក្នុងរដូវក្តៅឆ្នាំ ២០០៩ ក្នុងតម្លៃកំណត់ត្រាពិភពលោក ៨០ លានផោន ហើយខ្សែប្រយុទ្ធរូបនេះបានបន្តក្លាយជាអ្នកស៊ុតបញ្ចូលទីច្រើនបំផុតរបស់ Los Blancos ទៀតផង៕
ប្រភព: AF