ថ្មីៗនេះ ក្លិបបិសាចក្រហម Manchester United បានដាក់ឈ្មោះកីឡាករនៅក្នុងក្រុមរបស់ពួកគេចំនួន ៣ រូប ដែលនឹងត្រូវលក់ចេញ នៅមុនពេលទីផ្សារដោះដូរកីឡាករ រដូវក្តៅនេះ បិទទ្វារវិញ ។ នេះបើតាមការចុះផ្សាយពីសារព័ត៌មាន Manchester Evening News ។
គួរឱ្យដឹងថាកន្លងមក ក្លិប Man Utd បានចុចឈ្មោះ ខ្សែការពារកណ្តាល Eric Bailly , Phil Jones និង Axel Tuanzebe ជាកីឡាករដែលត្រូវលក់ចេញ ជាមួយនឹងក្លិប កំពុងតែមានភាពមមាញឹក នៅក្នុងទីផ្សារដោះដូរ ក្រោមដឹកនាំរបស់គ្រូបង្វឹកថ្មី លោក Erik ten Hag ។
ហើយឥឡូវនេះ បើយោងតាមការចុះផ្សាយចុងក្រោយ បានបង្ហាញថា កីឡាករចំនួន ៣ រូបផ្សេងទៀត ដូចជា Alex Telles , Aaron Wan-Bissaka និង Brandon Williams ក៏នឹងត្រូវដាក់លក់ចេញផងដែរ ។
បញ្ជាក់ផងដែរថា ថ្មីៗនេះ អ្នកចាត់ការក្រុមសញ្ជាតិហូឡង់ បានចុះហត្ថលេខានាំយកកីឡាករ Christian Eriksen , Lisandro Martinez និង Tyrell Malacia ដើម្បីមកពង្រឹងក្រុមរបស់លោកបន្ថែមទៀត សម្រាប់ត្រៀម មុនរដូវកាលថ្មីបើកឡើងវិញ ។
ទន្ទឹមនឹងការមកដល់នោះ ក្លិប Man Utd ក៏បានធ្វើការចែកផ្លូវជាមួយ Nemanja Matic, Paul Pogba, Jesse Lingard, Edinson Cavani និង Juan Mata រួចរាល់ហើយផងដែរ ប៉ុន្តែឥឡូវនេះ វាត្រូវបានគេជឿថា ក្លិបនឹងបើកចំហរក្នុងការបន្ថែមឈ្មោះកីឡាករប្រាំមួយផ្សេងទៀត ដើម្បីលក់ចេញ នៅទីផ្សាររដូវក្តៅនេះ ៕
ប្រភព: AF