ថ្មីៗនេះ កីឡាកររបស់ក្រុមបិសាចក្រហម Manchester United មួយចំនួន ត្រូវបានគេរាយការណ៍ថា ចង់ឱ្យមិត្តរួមក្រុមពួកគេរូបនេះ ដើរចេញពីក្រុមឱ្យបានឆាប់ បន្ទាប់ពីមានរបាយការណ៍ជាច្រើន បានរាយការណ៍ ពីចេតនាចង់ផ្ទេរចេញរបស់គេ ជាយូរមកហើយ នៅរដូវក្តៅនេះ ។
ជាក់ស្តែង ម្នាក់នោះគឺខ្សែប្រយុទ្ធ Cristiano Ronaldo ខណ:កន្លងមកគេបានជូនដំណឹងដល់ក្លិបបិសាចក្រហម ថាចង់ចាកចេញពីក្លិប អំឡុងពេលទីផ្សារដោះដូរកីឡាករ រដូវក្តៅនេះ ដើម្បីស្វែងរកឱកាសលេងនៅក្របខ័ណ្ឌ Champions League ។
គួរឱ្យដឹងថា កីឡាករវ័យ ៣៧ ឆ្នាំរូបនេះបានបង្ហាញខ្លួន ក្នុងនាមជាកីឡាករបម្រុង កំឡុពេលការប្រកួតចាញ់ ដោយលទ្ធផល 2-1 របស់ Man United ក្រោមថ្វីជើងក្រុម Brighton & Hove Albion សម្រាប់ការបើកឆាកក្របខ័ណ្ឌ Premier League ។
តែទោះបីជាយ៉ាងណាក៏ដោយ Ronaldo នៅតែត្រូវបានគេជឿថា កំពុងព្យាយាមជំរុញឱ្យមានការចាកចេញពីទឹកដី Old Trafford មុនពេលទីផ្សារដោះដូរ ត្រូវបិទទ្វារទៅវិញ ។
ហើយមិនតែប៉ុណ្ណោះ យោងតាមគេហទំព័រ The Sun ថ្មីៗនេះ បានបង្ហាញថាកីឡាករមួយចំនួនរបស់ Man United កំពុងមានភាពធុញទ្រាន់ ចំពោះស្ថានភាពមួយនេះ ហើយចង់ឱ្យគេចាកចេញពីក្លិបឱ្យឆាប់ៗ ។
បញ្ជាក់ផងដែរថា ទាំង Paris Saint-Germain, Bayern Munich និង Chelsea ស្ថិតក្នុងចំណោមក្លិបដែលបានទាក់ទងជាមួយ Ronaldo នៅពេលដែលដឹងច្បាស់ថាគេចង់ចាកចេញ។ តែទោះបីជាយ៉ាងណាក៏ដោយ ចាប់តាំងពីពេលនោះមក ទាំងនោះបានសម្រេចចិត្តដកចិត្តវិញ ខណៈដែលការចាប់អារម្មណ៍ពីក្លិប Atletico Madrid, Napoli និង Sporting Lisbon ក៏បានបញ្ឈប់ផងដែរ ៕
ប្រភព: Sportsmole