យោងតាមរបាយការណ៍ចុងក្រោយមួយ បានបង្ហាញឱ្យដឹងថា ក្លិបតោខៀវ Chelsea មានបំណងក្នុងការប្រើប្រាស់ខ្សែប្រយុទ្ធ Christian Pulisic ដើម្បីចូលរួមប្រជែង ក្នុងការចុះហត្ថលេខាលើតារាឆ្នើមរបស់ក្រុម AS Roma នៅរដូវក្តៅនេះ។
ជាក់ស្តែង កីឡាករដែលក្រុមរបស់លោក Thomas Tuchel ចង់បានមកកាន់ក្រុមនោះ គឺ Nicolo Zaniolo ខណ:ខ្សែបម្រើវ័យ ២៣ ឆ្នាំរូបនេះ បានក្លាយជាគោលដៅដ៏ចម្បងមួយ ពីសំណាក់ក្លិបធំៗជាច្រើនរួមមកហើយ រួមទាំង Tottenham Hotspur ផងដែរ ។
ក្រុម Spurs ត្រូវបានគេរាយការណ៍ថា បានឈានដល់កិច្ចព្រមព្រៀងជាមួយ Roma ជុំវិញការផ្ទេររបស់ Zaniolo ដែលនឹងឃើញខ្សែបម្រើរូបនេះ ផ្ទេរមកកាន់ PL ក្នុងលក្ខខណ្ឌខ្ចីជើង តែនៅចុងបញ្ចប់កិច្ចព្រមព្រៀងនេះ ត្រូវបានបរាជ័យវិញ ដោយសារលោក Jose Mourinho មិនសប្បាយចិត្តជាមួយនឹងការរៀបចំកិច្ចព្រមព្រៀងខ្ចីជើងនេះឡើយ ។
ហើយ កាលពីពេលថ្មីៗនេះ យោងតាមរបាយការណ៍ពីគេហទំព័រអ៊ីតាលី CMW បានបង្ហាញថា ក្លិប Chelsea កំពុងបង្ហាញការចាប់អារម្មណ៍ ក្នុងការនាំយក Zaniolo ទៅកាន់ក្របខ័ណ្ឌ Premier League ជាមួយនឹងការផ្តល់ជូន កីឡាករ Christian Pulisic ឱ្យធ្វើដំណើរទៅកាន់កីឡដ្ឋាន Stadio Olimpico ជំនួសវិញ ។
Pulisic បានជួបប្រទះការលំបាកខ្លាំង ក្នុងការបង្កើតភាពលេចធ្លោនៅ Stamford Bridge ចាប់តាំងពីផ្លាស់មកក្លឹបពី Borussia Dortmund ក្នុងឆ្នាំ ២០១៩ ដោយគេ អាចចូលលេងជម្រើសដំបូងនៅ Premier League ត្រឹម ១៣ លើកប៉ុណ្ណោះ ក្រោមការដឹកនាំរបស់ លោក Tuchel កាលពីរដូវកាលមុន ៕
ប្រភព: AF