បើទោះបី Real Madrid បង្ហាញទម្រង់លេងបានល្អ តាមរយៈការលើកពានរង្វាន់លីគកំពូល និងពានអឺរ៉ុបនៅរដូវចាស់ តែងាកទៅការយល់ឃើញរបស់ Joe Cole គឺសម្លឹងឃើញផ្សេង ដោយជឿថាក្លឹបការពារជើងឯក នឹងនៅចាញ់ប្រៀបក្លឹបយក្ស ៤ ផ្សេងទៀត។
អតីតកីឡាករជម្រើសជាតិអង់គ្លេស បែរជាចុចឈ្មោះក្លឹប ២ នៅអង់គ្លេស ១ នៅអាល្លឺម៉ង់ និង ១ នៅបារាំង ជាជាងក្លឹបយក្សអេស្ប៉ាញ អំពីការប្រជែងពានរង្វាន់អឺរ៉ុប រដូវកាល ២០២២/២៣។ បញ្ជាក់ថា ការចាប់ឆ្នោតក្រុមត្រូវប៉ះគ្នា នឹងបង្ហាញចុងខែសីហា ហើយការប្រកួតឈានចូលនៅរំលងពីរសប្តាហ៍បន្ទាប់ ខែកញ្ញា។
ប្រាប់ទៅ BT Sport លោក Cole បញ្ជាក់៖ “ខ្ញុំនៅតែគិតថា PSG, Man City, Liverpool និង Bayern Munich ស្ថិតនៅកម្រិតលើ Real Madrid ពួកគេជាក្លឹបដែលមានលទ្ធភាពខ្ពស់នឹងអាចឈ្នះពានអឺរ៉ុប នៅឆ្នាំបន្ទាប់”។
លោកបន្ត៖ “ខ្ញុំយល់ថា Real Madrid ជាក្លឹបឈ្នះជើងឯក មានបណ្តុំកីឡាករលំដាប់ World class ដែលយើងសមតែឲ្យតម្លៃខ្ពស់ទៅលើពួកគេ តែយ៉ាងណាយើងមើលប្រកួតទល់ Chelsea, Man City ឬសូម្បីតែវគ្គផ្តាច់ព្រ័ត្រចុះ Courtois គេធ្វើបានល្អណាស់ សឹងតែល្អបំផុតក្នុងអាជីព តើគិតថាវាទៅរួចទេ ពួកគេនឹងអាចធ្វើបានល្អម្តងទៀត”៕
ប្រភព៖ BT Sport