ម្ដាយរបស់ Cristiano Ronaldo, អ្នកស្រី Dolores Aveiro ធ្លាប់បាននិយាយថា កូនប្រុសរបស់អ្នកស្រី អាចនឹងមានលទ្ធភាព ក្នុងការត្រលប់ទៅចូលរួមក្រុម Sporting Lisbon ដែលជាក្លិបដំបូងដែលគេចាប់ផ្ដើមអាជីពបាល់ទាត់។
Ronaldo បានបង្ហាញខ្លួនជាផ្លូវការ ៣១ប្រកួតសម្រាប់ក្រុមធំរបស់ Sporting ដោយរកគ្រាប់បាល់៥គ្រាប់ និងបញ្ជូនឱ្យមិត្តរួមក្រុម៦គ្រាប់ មុនពេលចាកចេញទៅចូលរួម Manchester United។
អ្នកស្រី Aveiro បានសារភាពថា ប្រសិនបើ Ronaldo មិនត្រលប់ទៅចូលរួមក្លិបចាស់របស់គេនៅព័រទុយហ្កាល់វិញទេនោះ កូនប្រុសរបស់គេ Cristiano Jr. ដែលកំពុងលេងនៅក្នុងក្រុមយុវជនរបស់ Manchester United អាចនឹងទៅលេងឱ្យក្លិប Sporting។
ម្ដាយរបស់ Ronaldo បាននិយាយថា៖ “ប្រសិនបើ Ronaldo មិនទៅទេ, កូនប្រុសរបស់គេ, Cristianinho នឹងទៅ”។
“គេ(Ronaldo) មានអ្នកស្នងតំណែងរួចទៅហើយគឺ Cristinho។ ប្រសិនបើបំណងរបស់ ម្ដាយ និងជីដូនម្នាក់អាចត្រូវបានបំពេញ, នាពេលអនាគតដ៏ខ្លី កូនប្រុសរបស់គេម្នាក់នឹងលេងនៅ Sporting”។
រដូវកាលនេះ ជារដូវកាលដ៏លំបាកបំផុតមួយសម្រាប់ Ronaldo នៅក្នុងអាជីពបាល់ទាត់របស់គេ។ ខ្សែប្រយុទ្ធព័រទុយហ្កាល់រូបនេះ រកគ្រាប់បាល់បានតែ១គ្រាប់ប៉ុណ្ណោះ សម្រាប់ Man Utd គ្រប់ពានរង្វាន់ទាំងអស់៕
ប្រភព៖ AS