អ្នកចាត់ការក្រុមហង្សក្រហម Liverpool លោក Jurgen Klopp ត្រូវបានគេរាយការណ៍ថា អាចនឹងត្រូវចាកចេញពីទឹកដី Anfield ហើយនឹងត្រូវផ្ទេរចូលរួមជាមួយក្លិបនៅក្នុងក្របខ័ណ្ឌ Premier League ផ្សេងមួយទៀត នៅក្នុងពេលឆាប់ៗខាងមុខនេះ ។
យ៉ាងណានេះបើយោងតាមការចុះផ្សាយពីសារព័ត៌មាន Football Insider ដែលបានអះអាងថា គ្រូបង្វឹកសញ្ជាតិអាល្លឺម៉ង់រូបនេះ ហាក់ដូចជាកំពុងចាប់ចិត្តជាមួយនឹងការទៅចូលរួមជាមួយក្រុម Newcastle ប្រសិនបើគាត់ត្រូវដើរចេញពី Liverpool នោះ ។
គួរឱ្យដឹងថា Klopp ទទួលបានភាពជោគជ័យខ្លាំងបំផុតមួយ នៅ Liverpool ដោយបានឈ្នះពានរង្វាន់ធំៗជាច្រើន ។ តែទោះជាយ៉ាងណាក៏ដោយ តំណែងរបស់គាត់ នៅទឹកដី Anfield នៅពេលនេះ ហាក់ដូចជាកំពុងមានភាពសង្ស័យ ដែលនាំឱ្យមានការរំពឹងទុកថាគាត់អាចត្រូវដើរចេញពីក្លិប ក្នុងពេលឆាប់ៗនេះ។
វាកំពុងមានភាពទាញជាច្រើន ដែលនាំឱ្យលោក Klopp ត្រូវពិចារណាទៅចូលរួម Newcastle ដោយសារតែពេលនេះ ពួកគេឈរនៅលេខរៀងទី ៣ ក្នុងលីគ មាន ៣០ ពិន្ទុពី ១៤ ប្រកួត។ លើសពីនេះទៅទៀត សមត្ថភាពហិរញ្ញវត្ថុ ក៏អាចផ្តល់ជូនសំណើដ៏ទាក់ទាញ សម្រាប់គ្រូបង្វឹកណាមួយផងដែរ ។
លើសពីនេះទៅទៀត វានៅតែមិនប្រាកដថាអនាគតរបស់ Klopp នៅ Liverpool នឹងមានអ្វីកើតឡើងនោះឡើយ ខណ:គាត់នៅតែមានកិច្ចសន្យារហូតដល់រដូវក្តៅឆ្នាំ ២០២៦ តែវានៅតែត្រូវមើលថាតើគាត់អាចចាកចេញពីក្លឹបយក្ស Premier League នៅពេលណា?
ប្រភព: Sportskeeda