ឲ្យតែថាព្រម រយៈពេល ៣ ឆ្នាំ Cristiano Ronaldo នឹងទទួលបានប្រាក់ឈ្នួលចូលហោប៉ៅ ១៨៦ លានផោន ក្នុងការទៅចុះចូលជាមួយក្លឹបនៅឯទ្វីបអាស៊ី។ រំឭកឲ្យដឹង ពេលវេលានេះ CR7 កំពុងឈរជើងក្នុងលក្ខខណ្ឌឥតតម្លៃផ្ទេរ ឬ Free Agent លើទីផ្សារដោះដូរ។
យ៉ាងណាតាមដំណឹងចុងក្រោយ ចុះផ្សាយពី CBS Sports បានឲ្យដឹងថា Ronaldo ទើបទទួលបានសំណើថ្មីមួយទៀតពីក្លឹប Al-Nassr នៅឯប្រទេសអារ៉ាប៊ីសាអូឌីត។ ក្នុងកិច្ចព្រមព្រៀងនោះ ក្លឹបព្រមចាយលុយ ១៨៦ លានផោន ឬ ២៨៥ លានដុល្លារ ឲ្យតែបុរសសញ្ជាតិព័រទុយហ្គាល់ព្រមមកឈរជើង ហើយអាចថាហៀរចូលអាយុ ៤០ ឆ្នាំ។
តាមថាទៅក៏មានក្លឹបដទៃផ្សេងទៀត ដូច Newcastle United, Chelsea និង Inter Miami ជាដើម សុទ្ធសឹងចង់បានបុរសវ័យ ៣៧ ឆ្នាំ តែយើងមិនទាន់ច្បាស់ដូចគ្នា កីឡាករគិតគូរបែបណា ព្រោះជាការពិត បើជ្រើសដកខ្លួនចេញពីតំបន់អឺរ៉ុប ប្រាកដនឹងមិនបានលេងពានរង្វាន់ Champions League ឬពានកំពូលទៀតឡើយ។
គួរឲ្យដឹងថា Man Utd ជាក្លឹបអាណាព្យាបាលចុងក្រោយ បានបញ្ចប់កុងត្រា Ronaldo មុនកាលកំណត់ ទាំងពាក់កណ្តាលទី World Cup កំពុងចាប់ផ្តើមទៅហើយ។ ស្ថិតិរដូវកាលថ្មី ២០២២/២៣ បង្ហាញខ្លួន ១៦ ប្រកួត រកបាន ៣ គ្រាប់និង Assist ២ លើកឲ្យក្លឹបនៅឯទឹកដីអង់គ្លេស៕
ប្រភព៖ SportBible